El 25 de Novembre es el diya de la liberasyon de los enimigos de la sivdad de Edirne. I ay unos kuantos anyos ke la Munisipalitad d’Edirne mos envita para la resepsiyon ke organizan.
Este anyo fue diferente; estavamos envitados al muevo sentro kultural Atatürk ke fue fraguado este anyo. Al lado tyenen un konservatoryo de teatro. Un anfiteatro de 700 personas es reelmente empresyonante. La fondasion del Kuinsentenario esta organizando una pyesa de teatro kon la artista nasyonal, Dilek Türker i el titolo de la pyesa es Sarah Bernhard. Dospues de dos demonstrasyones en Estanbol en la sala Fulya, keremos azer una tresera demonstrasyon en esta sala en Edirne.
Tornando de Edirne a Estanbol me fui direktamente a la reunyon ke aviamos organizado para el DIDL. I fue este modo. Sali a las 9.00 de la demanyana del otel i a las 11.30 estava en Ulus.
Ocho o dyes personas yenas de emosion mos arrekojimos para realizar el program del diya. Ay tres anyos ke el program del DIDL se realisa kon el zoom. Ma este anyo lo vamos azer “face to face”. Es lo ke devemos de azer. En el Muzeo organizimos el Diya Evropeo de la Kultura Djudia no empleando el zoom. I esta vez reushimos a resivir entre 2.500 i 3.000 personas. El anyo pasado kon las dos posibilidades teniyamos solo 100 o 200 almas.
Malorozamente durante esta epoka tres de muestros amigos mos desharon la buena vida. Muestro amigo, Henri Çiprut ke lavoro muncho para este diya, Selim Hubeş ke lavoro muncho para las pyesas de teatro i ke kompozo munchas kantikas para los Pasharos Sefaradis. İzzet Bana esta organizando un konsyerto kon las ovras de Selim Hubeş ke van ser interpretadas por el Koro Nes i por las Estreyikas d’Estanbol. Espero ke vamos a reushir a komemorar a Selim Hubeş.
Es muestra amiga, Esti Saül ke del primer Diya se entereso kada vez para realizar una ekspozision en estos diyas. I reusho kada vez de organizar una o dos ekspozisiones. Ke su alma repoze en Gan Eden. Este anyo muestra amiga, Eti Koen va organizar una ekspozision de Pachwork i puedeser una demonstrasion kon muzika.
I este anyo tenemos un teatro en Judeo Espanyol. Una pyesa eskrita por Forti Barokas. El rejisor es Ferit Kohen. I ay un alay de djente ke djugan en esta pyesa. Esperamos ke va ser una reushita para este grupo.
Kada anyo keremos envitar una persona presyoza de un otro payis, ke mos va kontar syertas kozas sovre muestra lingua i kultura. El anyo pasado pensimos a realisar el diya sin emplear el zoom. Ma todo troko dospues. Aviamos envitado a Rachel Amado Bortnick. Esto lo vamos a realisar este anyo. Acheto de vinir a Estanbol. I va ser un plazer de resivirla i de oyer su avla.
Komo kada anyo Süzet Herman, Anna Eskenazi i Şeli Gaon mos van a presentar lo ke deven de avlar.
Tenemos otras kurtas prezentasiones. Ma no vos kero dizir antes ke se realizen.
Estamos aparejando un pranso de komidas sefaradis. Para un diya ke empesa a las 11.00 i ke topa fin a las 17.30, no es posivle de no ofreser komida.
Esperamos ke esto todo vos va enteresar i vamos a estar endjuntos el 26 de Febrero 2023.
