Oy eskoji unos kuantos proverbos enteresantes de diferentes paizes del mundo.
- No es la fuersa de la agua ke buraka la pyedra, ma es la kontinuidad de las gotas. (Brasil)
- Dingun mupak no es bastante grande para pueder tomar dos mujeres. (Sudan)
Amar, kerer byen es komo tanyer el vyolon, el ke no save tanyer kita bruidos negros. (Bolivya)
- La fama es la solombra del talento. (Inglaterra)
- La ermozura es el primer regalo de la natura para las mujeres, ma tambyen es el primer ke lo toma atras. (Chile)
- No emporta la altor de un arvole, sus ojas kayen syempre en basho. (China)
- El oro se aprova kon el fuego, la mujer se aprova kon el oro, el ombre se aprova kon la mujer. (Amerika)
- Las mujeres riyen kuando pueden i yoran kuando keren. (Venezuela)
- La mujer es komo una solombra, se fuye kuando la persiguen, korre de detras de los ke pasan delantre de eya. (Kongo)
- Avrí los ojos en kuatro antes de kazar, despues de kazar serralos sinkuenta por syen. (Portugal)
- La felisidad pasa solo una vez en la vida de todos. (Venezuela)
- El amor verdadero es inolvidavle mizmo si estas separada. (Belgia)
- Kuando uno de los ermanos se aze riko komo el otro, los ermanos se keren byen. (Uganda)
- El kazamyento es komo una torre. Los ke estan afuera penan para entrar aya, i los ke estan aryento penan para salir de aya. (Tayland)
- Mas vale el mazal negro ke vyene presto, ke el mazal bueno ke vyene tadre. (Albaniya)
- El saverisyo es el enimigo de la kreensya. (Anonimo)
- La luvya de Avril traye flores de Mayo. (Kanada)
- Kuando te echas a la kama, desha los problemes en tus vistimyentas. (Holanda)
- Las dolores grandes son kayadas. (Italya)
- Las tristezas chikas avlan, las ansyas grandes son mudas no avlan. (Nijerya)
- Unirse, adjuntarse es un empesijo, azer turar la unyon es un desvelopamyento, lavorar endjuntos es la reushidad. (Amerika)
- Los ideales son komo las estreyas, no es posivle de detenerlos, ma eyos mos arelumbran el kamino en las noches eskuras. (Fransya)
- La mentira se va galopando, en koryendo, la verdad kamina a poko a poko kon pasos chikos, ma arriva al tyempo djusto. (Norvej)
- Nasemos de una manera, ma mos murimos de mil maneras. (Yugoslavya)
- Un ombre kere byen a su amante i su famiya ma, lo mas muncho a su madre. (Irlanda)
- La vengansa es un plato ke se sirve yelado. (Fransya)
- Un inimigo klaro, ke se save es mijor ke un amigo sekreto. (Turkiya)
- No te kanses. Desha, ke akeyos ke keren akompanyarte en la vida, vengan kon ti. (Turkiya)
- Desha de bushkar la persona perfekta.
Lo ke tyenes menester es alguno ke pensa ke tyene mazal de tenerte allado. (Turkiya)
- Si tyenes koraje de irte de detras de el, todas las imajinasyones pueden azersen realidad! (Turkiya)
