En la antikuedad el umano desho muy poko de esyerkol. Oy, lo ke deshamos en jeneral, es el ambalaj, lo ke se puede utilizar solamente una vez i lo ke mundamos de las frutas i de las verduras krudas, antes de gizar. En una sivdad komo Roma, kapital del imperyo Romano, el esyerkol se echava a la kaye. Las luvyas i munchas vezes una fuente monumental ayudavan al esyerkol de irse direktamente a los riyos o a la mar. La otra forma de esyerkol, se utilizava komo engredyantes para kultivar en los kampos. Roma se konose komo una sivdad de 7 kolinas, ama kon los pedasos de seramika rotos, ya tuvo la ochena kolina ke se yamo “El Monte Testaccio”. Se dize ke de las mueve kanalizasyones de akel tyempo, 2 de eyas estan todaviya en uzo.
Ay ken dize ke los Romanos i los Djudyos fueron los mijores puevlos para kuidar el esyerkol. Savemos ke el esyerkol de una persona dize muncho sovre esta persona. La mizma koza, el esyerkol de una uma, dize muncho sovre esta uma. Los Romanos i los Djudyos tuvyeron metodos paresidos para kuidar i transferir el esyerkol. El arkeologo Yuval Gadot de la Universita de Tel Aviv mos eksplika ke se enkontro una kolina yena de esyerkol en Yerushalayim. Para el arkeologo, el esyerkol no es una piedrita de tyempo, al konrtraryo le ensenya munchas kozas sovre la komida, las uzansas de diyeta, i de komersyo. Esta kolina se enkontro en lo ke yamamos oy la “Sivdad de David”. Esta eksplorasyon mos dize ke este lavoro no fue un lavoro de una persona ma un lavoro publiko, de la munisipalidad o del estado. Las tabakas diferentes de esyerkol i tyerra mod eksplikan ke enterravan el esyerkol para evitar la golor feya i mantener la salud publika. Los arkeologos supozan ke el esyerkol se arekojiya de las kazas i de las kayes, i se yevava a la kolina en sestos ensima de aznos.
La limpyeza en la epoka Romana no era solo por la salud, ma era tanbyen una santedad. Kon la mueva relijyon kristyana, la limpyeza troko de forma. Los banyos romanos ke eran komo un ritual para los sivdadanos, un ritual de irsen kada diya, se konsideraron komo un lugar de pekado. Al lado de kada banyo romano puediya aver i un jimnazyom ande los jovenes se entrenavan para tener un puerpo sano komo dize la dicha: “Una kavesa sana sovre un puerpo sano” se konsideraron tanbyen komo otro lugar de pekado, porke los jovenes se entranavan estando kompletamente desmudos. Las kayes romanas empesavan en jeneral por una fuente monumental de ande saliyan las aguas i alimpyavan la kaye. La fin de los banyos romanos i de fuentes monumentales fueron el empesijo de las pandemiyas i de munchas hazinuras. La relijyon mizmo prohibyo al ombre de araparse, dizyendo ke esto es kontraryo a la kreensia. Sin el sistem de kanalizasyon ke oy vemos en Efesos o otras sivdades romanas de la antiguedad, la kayes yenas de esyerkol, trayeron las ratas i las hazinuras una detras de la otra. Al lugar de mantener la saviduriya, vinyeron la superstisyon i la inyoransa.
Oy savemos muy byen la valor de kuidar el esyerkol i mos akodramos de los diyas ke Estanbol tanbyen sufriyo del mal tratamyendo del esyerkol.
UNA KAYE ROMANA ANTIGUA
