El “Dr. Yosef Sevi” eskrivyo este livro presyozo, “De Balat a Ashkelon” en el kual konto su vida, su chikes ke paso en Balat, i despues izo aliya a Israel.
Balat es un kazal en Estambol ande nasyo el Dr. Yosef Sevi i paso su manseves. El elemento el mas emportante ke aze muy valutozo el diskrikto Balat es, a kavza de las diferentes kulturas ke konteniya antes anyos…
Aki, munchas personas de diferentes raises i relijyones biviyan endjuntos kon grande armoniya komo ermanos.
Todos se konosiyan unos kon los otros. La solidaridad entre los amigos, los vizinos era muy natural.
Lo ke kedo oy de Balat, es solamente las memoryas.
Los dalkavos shaetes de una vida kozmopolita, empesaron a abandonar el pais en los anyos 1960, por las razones ke konosemos. I este modo la alma de Balat se desparesyo.
Kuando estamos meldando estas memoryas ke eskrivyo kon un stilo ermozo i fluente, mos esta dando una sansasyon de nostaljiya. Yosef Sevi mos esta prezentando una lektura enteresante en kontando su chikes majika de kada dia en Balat. En akeyos anyos, Balat era un lugar serrado al mundo eksteryor. Despues de Balat, Yosef Sevi i su famiya trokaron de kaza i se fueron a Kurtuluş, i despues anyos izyeron aliya a Israel. Esta kontando a sus lektores, kon una lingua simple, kompleta la aventura de su vida.
En mizmo tyempo Dr. Sevi esta kontando su aventura yena de dolor, alegriya i tristeza, ke paso en Balat, Kurtuluş i Israel, el amor por su profesyon, el eskarinyo profondo ke tyene por Balat, kon una lingua naiva.
El eskrivano trato en este livro, de su chikes, su manseves, su famiya, sus anyos de la eskola segondarya, i anektodas de sus dias maraviyozos ke paso en Balat.
Durante el livro, Yosef Sevi aparese komo un siantifiko i en vezes komo un narrador.
Estamos bivyendo kon el en los tyempos vyejos.
En eskrivyendo la istorya de su vida en este livro, a vezes se esta konvyertendo en el eroe de la istorya. Despues esta kontinuando su kamino komo narrador.
Una vida enteresante, yena de memoryas, Yosef Sevi empeso su vida komo doktor. El empesijo fue difisil, ma en kurto tyempo se izo byen kerer i un doktor respektavle amado por todos.
Atado a sus tradisyones el Dr. Sevi tyene el grande eskarinyo de pueder ver el respekto i la kerensya entre las personas komo al tyempo kuando biviya en este kazal chiko.
Un livro ke deve de meldarse sovre todo por los ke son de Balat. Munchos detalyos i mesajes amostrando la vida dal tyempo, la vida de los djudyos, antes 60 anyos en Estambol .
