La menora es el sembol de la luz. Esta luz divina ke aparese de los primeros pasos ke azemos en el Bereshit (Ke la Luz seya i la Luz fue). Luz briyante, luz santa ke rompyó la eskuridad, arelumbró el abizmo, dió vida al kaos i soplo de egzistensya al universo de la kreasyon. Luz ke el umano no puede alkansar ni arelumbrarse de eya, siendo ke los luminaryos dirijados verso el ombre no aparesyeron ke el kuatren diya.
Luz santa ke para meterse aproksimita del ombre, se estrechara, se estrechara sigun la teoriya de Tsimtsun ke entro en la tora. (Torat-Or, Tora de Luz). Ansi todo el ke melda, estudia, ensenya la Tora se aserka de la Luz Divina. La menora komo savemos keridos ermanos, es el sembol de la luz ke durante los sieklos, asta oy, mos akompanya en muestra larga estorya. La menora fue echa en los anyos del dizyerto por Betsalel, ijo de Ur del trivio de Yehuda, kon martiyo, en un blok de oro puro sigun las preskripsyones de las Alturas Santas…
La menora de un solo pedaso… Un solo komo la Tora, a nada no se adjusta, ni dingun biervo no se kita. La menora tiene syete brasos komo los syete diyas de la semana, komo los syete padres de la Ley, komo las syete fiestas esansyelas del judaizmo, komo las syete sensyas, komo las syete planetas i otros grupos de syete. Mizmo tengo meldado un komentaryo ke la Tora tiene syete livros, por ke el livro Bamidbar tiene syete seksyones: Bereshit, Shemot, Vayikra, Bamidbar ke se puede kontar tres partidas, i la Devarim. El braso de en medyo de la menora reprezenta el Shabat verso el kualo los tres brasos de kada vanda se estan enkorvando. (Tres diyas antes aparejaras el Shabat i tres diyas despues lo akompanyaras). Kada braso komporta una kyase ande se mete la azete ke va kemar, un burjon i en la punta una flor de arvole de almendra. De la kyase, pasando por el burjon la flama suve verso la roza. Tres etapas ke tienen una muy grande valor sembolika. Kada uno de mozotros arekojemos en la kyase de muestro meoyo lo ke mos ambezamos, la kultura ke tomamos de muestra famiya, de muestros savyos, de la sosyeta, i de otros. La kultura ke arekojemos de muestro meoyo es asta el stad del burjon… Lo ke aresivimos lo analizamos, lo dijeramos, pensamos i lo ke mos keda lo puedemos dar a otros komo el parfüm de la roza, komo la flama de la menora ke aklara el entorno de su luz. Lo ke tomamos lo daremos. Lilmod u lelamed, ambezar i ensenyar.
Dingunos de mozotros no somos un haham, ma todo el ke save un pasuk, un biervo i mizmo una sola letra de la Tora kale ke lo ambeze a otro, es un dever sakro para kada judio… Daremos mizmo lo poko ke savemos i ansi manteneremos la ermandad i la amistad entre todos los miembros de la komunita i de muestro puevlo.
