Todos savemos ke en 1905, un grande fuego en Edirne en Kaleiçi dyo fin a la vida Djudia de la sivdad. Antes del fuego, egzistiyan munchas sinagogas en Edirne. Ya savemos ke en 1096 egzistiya el Kal de los Gregos ke era una sinagoga de los Djudios Romaniotes. Los Djudios Hungaros fondaron la Sinagoga Budun. En 1470, Ludwig X echó afuera los Djudios Almanes i una partida vinieron a Edirne i fondaron el Kal de los Almanes. El Kal Katalunya fue fondado por los ke transportaron la Yeshiva de Nahmanides a Edirne. I estos eran la famiya de los rabis Geron. El Kal Pulya fue fondado por los Djudios ke vinieron de la sivdad Italiana Apulia. Los ke vinieron de la Isla de Mayorka fondaron el Kal Mayor i los ke vinieron de Toledo fondaron el Kal Tolya. I los ke vinieron de Sisilia fondaron el Kal de Sicilya (o Hichilya). Los Djudios ke vinieron del Portugal fondaron los Kales Evora i Portugal. Aparte de estos Kales en Edirne se topava syertos Kales o Midrashes ke refujyavan las personas ke lavoravan en un syerto echo komo los kasapes avian fondado el Kal de los Kasapes; los sepetchis el Kal de los Sepetchis; los Hammales el Kal de los Hammales; los Kufedjis el Kal de los Kufedjis; los vendedores de frutas el Kal de los Fruteros. Aparte de esto se topava syertos midrashes komo el Kal de Kemal Abravanel, Kal de la Kaye, kal de la Eskola… En el livro de Naim Güleryüz sovre los Djudios de Edirne dize ke se topava serka de 40 kales o midrashes en las kazas.
I dospues del fuego ande todos estos kales i midrashes fueron kemados, los dirijentes dyeron karar de fraguar solo una grande Sinagoga i esta fue fraguada por el arkitekto fransez, France Depre. I la Sinagoga era pronta para la fiesta de Pesah del anyo 1907.
Es la semana pasada ke el mayor de Edirne, el sinyor Recep Gürkan me telefono demandome ke penso sovre un edifisio ke se topa en Kaleiçi i ke fue empleada dospues del famozo fuego. El kal de los Yemishchis. I me disho ke ensima del edifisio se topa la data de 1909. Agora eskrivyendo mi artikolo reelmente no entendi si avia dos Kales de los Yemishchis. Uno antes del fuego i el otro dospues el fuego.
Ya se ke ay anyos ke el Mayor Gürkan kere restorar una kaza Djudia en Kaleiçi, el kuartier antiguo Djudio de Edirne. Para kualo? Su idea es ke los Djudios tenian un rolo muy emportante en el pasado de esta sivdad. I me demando mi idea. Ya puedemos formar una kaza Djudia komo un muzeo, mizmo esta kaza puedeser un restoran ande se puede komer komidas djudias de Edirne. I mizmo en esta kaza puedemos formar un Cafe ke va ofreser borekas, boyos, biskochos de raki i otras kozas de las komidas Djudias de Edirne. Kon un chay o un kafe turko.
Para este edifisyo ay munchas kondisyones ke son konvenivles. Komo es un edifisyo istoriko tyene todas las permisiones para su restorasyon.
Vamos ayudar la Munisipalidad de Edirne para ke reushkan a resivir un fondo de la Union Evropea. Empesimos mizmo a evaluar el proyekto.
