Este anyo estamos realizando el DIDL (Diya Internasyonal del Ladino) el 26 del mez de Febrero. Todos se estan aparejando. En este diya tenemos diferentes aktividades. No tenemos ni solo un konserto, ni solo un teatro. Komo organizamos una vez al anyo, malorozamente komemoramos muestros amigos ke mos desharon la buena vida durante el anyo. Unas kuantas personas disheron kualo es esto? Tanta komemorasion. Ma no penso de la mizma manera. Verso la fin de la semana pasada piedrimos a muestra amiga, Coya Delevi, la madre de muestro amigo, Metin Delevi. Anyos i anyos Coya eskrivio artikolos en Judeo-Espanyol. Eya eskrivio un livro sovre sus memorias: “Una Ijika Chika de Galata”. Es el diya de Alhad ke se realizo los funerayes. Ke su alma repoze en Ganeden. I espero ke Metin Delevi, su ijo, mos va prezentar una avla sovre su madre, Coya i su livro en el DIDL.
Ya savemos ke el muevo anyo para mozotros, para los djudios es la fiesta de Rosh Ashana. Ma esto no troka la verdad. Empesando por la vida ekonomika, todos los payizes i todas las firmas komersiales organizan sus echos sovre el kalendaryo kristyano o komo se fue achetado en 1582 por el Papa Gregorius XIII i es nombrado el Kalendaryo Gregoryano. Ya savemos ke kon este kalendaryo, kada anyo tenemos las sezones en las mizmas epokas. Esto es muy difisil kon el kalendaryo muzulmano, i ay syertas chikas diferensyas kon el kalendaryo Ebraiko.
Los Kristianos i los payizes Evropeos reusheron a influensar todo el mundo, mizmo la Turkiya, muestro payis ke es 99 por syen muzulmano, kon sus kalendaryo i kon sus aktivitades de fin de anyo. Oy en diya munchas kayes, grandes moles de vendida i la grande majorita de los magazenes estan adornados para la fin del anyo o para el empesijo del muevo anyo. El anyo muevo es muy emportante para los ke lavoran en las kompanyias komersyales, en las fabrikas, en la burokrasia, en todo modo de magazenes. Deke? Porke en empesando de esta epoka, el governo i los patrones azen pujar las mezadas de estos lavorantes. Despues de un anyo asemejante, esto es muy emportante para los ke van a resivir las muevas mezadas mas elevadas i para los patrones ke van a pagar muncho mas para estas mezadas. Yo komo so retretado, va resivir una mezada mas elevada. Ma va ser obligado de pagar mas muncho a todos los lavorantes ke lavoran en muestra kompanyia. Anyos i anyos muestro payis bivio kon una enflasion alta. Dospues la situasion se kalmo, ma spesyalmente este anyo fue una desgrasya. Vemos la pujita de los presyos. Reelmente es muy difisil de pueder suportar esto todo. Vos oguro un muevo anyo kon presios fiksos i muncha ganansia a todos.
