Aldo Sevi
En 1881, el ambasador de Espanya al Imperio Osmanlí (Otomano), el Conde de Rascón, propozó a su governo a akseptar djudiós sefaradís si kijieran emigrar a la Espanya, i desvelopar relasiones kulturalas kon los ke preferían a kedar ande moravan. Además rekomendó al governo espanyol de avrir una linya maritima entre Sevilya i Odesa via Estambol, i también dos institutos universitarios, uno en Estambol i el otro en Salonik. Estos planos no se realizaron, siendo ke ande los sefaradís no avía muncho entuziazmo por la Espanya, i de otra parte, Espanya era relativamente prove i atrazada i de todo modo las relasiones kon los sefaradís no eran de gran importansa por el governo Espanyol. En fin la Espanya ya dio refujio a unas kuantas famiyas ashkenazías ke avían fuyido de los pogromes en Ukrayna a Estambol.
Dos anyos después, el Dr. Ángel Pulido Fernández publikó un reportaje en la gazeta "El Liberal" sovre enkontros ke tuvo durante sus viajes en el Balkán en el enverano de 1883 kon djudiós ke avlavan espanyol. El reportaje espertó un intereso públiko, i mizmo dio a luz a la ideolojía del Filosefardizmo ke tenía el buto de aserkar a los sefaradís, afín de integrarlos en la nasión espanyola. Los sefaradís fueron persividos komo "espanyoles sin pátria". Grasias a este redeskuvrimiento de los djudiós espanyoles por los espanyoles, delegasiones de investigadores de Espanya viajaron a las komunidades sefaradís para dokumentar la lingua djudeo-espanyola i las ovras en esta lingua, espesialmente las romansas i las kantikas ke se pasavan de boka de una jenerasión a la otra. Tuvimos mazal grande siendo ke estos investigadores yegaron a muestras komunidades djusto antes ke esta tradisión de transmisión oral se rompiera.
