La ovra, Hanukkah Carol, ke dainda no se save si va ser una animasion, un filmo o un muzikal de Broadway, fue eskrita kombinando las tradisiones de los judios de los Estados Unidos, la kultura pop i la komedia. Pensando a la reushita de los judios en el kampo de muzikal, se puede dizir ke un muzikal de Hanukkah esta pronto a naser. Se esta bushkando un produktor para el muzikal en esta etapa. Dependiendo de la situasion, el muzikal se va projektar en un teatro, en un sinema o en la plataforma de transmision dijital. Kuando el senaristo i aktor Harrison Bryan, ke nasio i se engrandesio en Brooklyn, embiyo el senaryo, ke el kompleto en una noche en 2018, al kompozitor de New York, Aaron Kenny i al eskritor Rob Berliner, los dos empesaron a lavorar kon Bryan. Se sorprendieron komo un muzikal komo este no fue kreado fin oy. Kuatro anyos despues, todas las kantikas del muzikal estavan prontas.
El 18 del mez de desiembre se realizo un konserto en Manhattan ande se enterpreto todas las kantikas del muzikal. Este konserto tambien sirvio para arekojer donos para la produksion del muzikal. El ke pago 15 dolares tuvo la oportunidad de ver el konserto en bivo.
El personaje prensipal de la istoria, es un kruelo Hava, ke fue mal tratado kuando era chiko porke era judio. Hava kere ganar reputasion en publikando videos verguensos sovre su famiya i amigos. En una noche de Hanukkah, Hava akepto los espiritus del pasado, prezente i futuro de esta profesion.
Mezmo ke ay munchas ovras de teatro i filmos ke azen referensia direkta a la novela de Charles Dickens de 1843 'A Christmas Carol', 'Hanukkah Carol' es emportante porke kontiene el onor judio, las tradisiones, la struktura familiar i Tikkun Olam (valor judio para arreglar el mundo) i el estereotipo de la madre judia. Estas karakteristikas lo esta separando de las otras ovras.
Bryan disho ke mezmo ke los elementos judios son dominantes, el muzikal puede adresarse a las personas de todas las relijiones porke es un mesaje de union. Tambien ay referensias al muzikal 'Fiddler on the Roof'. Hava, ke se kompara kon el personaje kruel de 'Scrooge' en 'A Christmas Carol', va ser ekskluido de su propia famiya porke konstantemente el esta desdenyando su famiya i no esta asistiendo a las komidas durante las vakansas. Hava esta viendo su padre diziendo: "El se murio por mozotros", kuando su futuro espiritu lo esta vijitando. En ‘Fiddler on the Roof’, el padre Tevye prononso estas palavras kuando su tresera ija, Hava, se kazo kon un non judio.
Mezmo ke no ay telefonos entelijentes en Anatevka, 'Hanukkah Carol' i 'Fiddler on the Roof' son similares en terminos de eksplorar lo ke es el judaizmo en el pasado, prezente i futuro. El espektakulo, esta bushkando una repuesta a la kestion ‘kualo es la tradision’. Despues ke se eskapo el senaryo i las kantikas, en 2022, los tres kreadores del programa filmaron un fragman animado. El fragman, yeno de elementos de komedia, tenia una mision de arekojer donos para promosionar el muzikal. El konserto, en el kual se enterpreto las kantikas del muzikal en un senario teatral durante una sola noche el 18 de desiembre, se realizo grasias a estas donasiones. El 6 de desiembre, ocho aktores judios, kon eksperiensa en Broadway, enterpretaron la lektura por la primera vez. Los spektatores los aplodisaron en piez.
