El mez de Desembre es mez de fyestas ermozas i aklaradas. Kada anyo Hanuka kon Noel kaye en mezma data, no kale olvidar ke en mezmo tyempo se fyesta la fyesta de Mevlana. Unos kuantos anyos antes tuve la shans de ir a Konya i kedi kuryoza kuando estavan baylando en aboltandosen sin kedar i ke karar de difisil es ser dervish. A este sujeto meldi una eskrita de un mansevo muy valutozo ke es en mezmo tyempo gid turistiko, ekrivano del Şalom, muestro kerido, MOİS GABAY.
Eskrito por Mois Gabay
Traduksyon por Forti Barokas.
La semana pasada yevi a un grupo a Konya ke era la semana de ŞEB-I ARUS.
Mevlana dize “Ven, seas lo ke seas, ven”
Si keresh saver la verda, yo estava aravyado kon Konya porke en el anyo 2019 la Munisipalidad de Konya enkolgo kartelas en las paredes i en los otobuses kon las palavras:
“No vos agash amigos ni kon los djudyos ni kon los kristyanos”
Malgrado todo, mi Konya es una sivdad ke tyene una erensya istorika i el amor inmortal de Mevlana. Me akodri ke tengo meldado, lo ke se paso en el funeral de Mevlana i komo un buen djudyo, kije profitar de sus buenas dokrinas i ensenyansas.
El diya del funeral de Celalettin-i Rumi Mevlana, un punyado de ulemas, empesaron a gritar. “Ke echo tyenen los djudyos i los kristyanos entre los musulmanos ke selebran un funeral de un sheyh”.
Ensupito echo la boz el Padre Stefani i disho:
“El sol es para todos, komo el sol kon su luz aklara el mundo entero”. El lider Mevlana kon su luz aklara la verdad al mundo entero.”
El lider de los djudyos se seko sus lagrimas i disho:
“Mevlana era pan, es ke un ambyerto fuye del pan?”
Estas palavras le toko al korason de Muneddin Pervane. Avryo los brasos i disho: “Dingun poder ni fuersa no puede separar de aki a los ke no son Muslumanos” Esto no era lo ke dezeyava Celaleddin “Ven, seas lo ke seas ven.”
Seb-i Arus, Hanuka, Noel, ke felisidad los ojos ke ven la luz i el kamino ke va al Kreador del mundo.
AVRE MUESTROS KORASONES
Para ke demos kerensya a los ke tyenen menester
AVRE MUESTROS MEOYOS
Para entender ken tenemos en el entorno
DAMOS SALUD A MUESTROS PUERPOS
ALEGRA MUESTRAS KAZAS
DAMOS AZLAHA EN LAS ALDIKERAS
NO MOS AGAS PERDER LA SAVIDURIYA DE MUESTRAS KAVESAS
DAMOS AMOR PARA KERER A TODAS LAS PERSONAS KE KRIYATES, SIN APARTAR SUS LINGUAS, SUS RELIJYONES I SUS RASAS
HANUKA ALEGRE
