Aunke la mayoria de los Djudios de Etyopya, Beta Israel, komo se yama propyamente la Komunidad de Etyopya (esta komunidad es konosida vulgaramente komo los Fallashas ma komo esta palavra en sus linguas tyene un senso no muy ermozo, esto preferando emplear este nombre siyentifiko), izyeron Aliya i fueron inkluidos en la Komunidad Djudia Mundial, tyenen sus propyos uzos i tradisyones unikos.
Una de las mas importantes de estas tradisyones es la Festividad de Sigd, ke se selebra el 29 de Heshvan (este anyo el 23 de Novembre). Sigd es una palavra amharika (Amharik es una lingua semitika ke se avla en Etyopya i en sus doredores) ke sinyifika “enkorvamyento”, (komo uzan los Muzulmanos para sus orasyones), ma tambyen este byervo es relasyonado kon la palavra amharika para Templo.
Sigd selebra la akseptasyon de la Tora. Syertos relijyozos i akademikos pensan ke esta tradisyon empeso en el siglo XV, kuando los Kessim (los Hahames) arekojeron i unyeron a los Beta Israel para fortifikar sus konfiyensa en la relijyon despues de aver sufrido un peryodo de grande persekusyon. Los Kessim se inspiraron en la deskripsyon del Livro de Nehemya de komo el puevlo ke aviya tornado de Babilonya despues de 70 anyos de egzilyo se konsakraron a segir los kaminos sagrados del Dio i de la Tora: “Todo el puevlo se adjunto komo un solo ombre en el lugar espasyozo ke estava delantre la Puerta de las Aguas [del Templo]; i disheron a Ezra, el eskrivano ke trayera el Livro de la Ley de Moshe Rabenu, ke Dio aviya mandado a Israel” (Nehemya 8:1).
En Etyopya, los Beta Israel se reuniyan en las simas de las montanyas serka de sus kazales. En Israel oy (ande Sigd es un dia de konje, un dia feriado legal rekonosido), se arekojen en Yerushalayim en un lugar desde se puede ver el Monte del Templo. El dia empesa kon el ayuno, kon un taanit ma se eskapa kon una fyesta, kon un grande pranso. Durante el dia, se melda psalmos, se melda publikamente el “Orit” (la Tora i los livros santos eskritos en el antiguo “geez”, una antigua lingua semitika utilizada ekskluzivamente en la orasyon), se realizan las promesas monetaryas i a la fin empesa la selebrasyon jeneral.
