Paro, rey de Ejipto, se sonya una noche un suenyo muy trublado i se le esmove su suenyo, i no puede durmir.
A la manyana manda a yamar a todos los savyos del pais para ke le digan la eksplikasyon de este suenyo, i ninguno de eyos pudo dizirle una koza ke se le aresentara en el korason. I Paro se determina de kitar del mundo a todos los savyos de su pais, una vez ke no pudyeron eksplikar su suenyo i para ke syerven mas? Entonses, se rekorda el grande maestro de los vinos de su suenyo, i de la djusta ekspliksyon ke le tuvo echo Yosef, i le propoza a Paro de traerle este esklavo djudyo para ke le eksplike su suenyo.
Paro, sin perder tyempo, enkomendo a sus mosos ke se lo yeven al palasyo kon repozo ke no se aturve i pyerda su sensya i saver. El primer diya de este anyo, diya de Rosh Ashana, fue yevado Yosef al palasyo de Paro para eksplikarle su suenyo.
El Kriyador ke envelunto pagar una buena paga a Yosef i ennalteserlo por su djustedad i onestedad i por amor de sus padres, estuvo en su ayudo i ekspliko el suenyo de Paro tal i kual sigun lo ke amostrava i le dyo a saver ke esto era un avizo del Kriyador ke le avizo a Paro ke despues ke tyene ke ser 7 anyos de artura i abondansa de sivera en el pais, tyene ke aver 7 anyos de una ambrera muy fuerte i le konseja en mismo tyempo ke tome sus prekosyones por no deshar sufrir al puevlo de ambre. Paro aun ke se konvensyo ke esta soltura es verdadera kon todo le demanda a Yosef ke le de un sinyal ke su eksplikasyon es verdadera. Yosef le profetiza lo ke le teniya akonteser akel mismo diya. I es ke su mujer, la reyna le tyene ke parir un ijo i en vista ke nase este ijo se tyene ke murir el otro, ijo ke teniya aedado de dos anyos.
Vyendo Paro ke la profetizia de Yosef se firma, se konvensyo mas muncho de la verdaderiya de la soltura del suenyo, i konsejandose kon los grandes de su reynado, lo nomino a Yosef Grande Ministro i patron de toda la tyera de Mistrayim i le dyo todos los poderes en su mano para ke rijga su governo sigun su pareser. Yosef se asento en siya de reynado kon muncha onra. Fue kerido i amado en ojos de Paro i de todo el puevlo i le dyo Paro a Asenat, ija de Potifera, de la sivdad de On por mujer. Entonses teniya Yosef 30 anyos.
