La semana pasada vos eskrivi un artikolo ke tenia el titolo “Verso la fin del anyo”. I un diya dospues me ambezi ke el muzeo de las Islas, Shabat i Alhad estava organizando un festival de “muevo anyo”. Shabat me fui a la Ada para pueder partisipar. Estava un diya de enverano kon 18 grados de kalor. Reelmente syenes de personas vinyeron a la Ada para pueder partisipar a este diya.
Aviya tres konferensias de medya ora, entre munchas aktivitades, kada una sovre las mezas de anyo muevo i la famoza Maria Ekmekçioğlu ke es la patrona de la guerta de Maria (Maria’nın Bahçesi) ke mos konto sovre las mezas de Noel i de anyo muevo de los Gregos d’Estanbol.. Ya savemos el restoran ke tyene en Etiler. Ma agora tyene otros restoranes. En Bodrum, en Urla, en Atina i otros lugares. Mos konto lo ke azia su madre las noches de Noel i de muevo anyo. Las komidas ke gizava su madre kada noche de anyo muevo. Todos avlaron de los likorinos; de las lakerdas; de las taramas i de las dolmas. Muy enteresante me ambezi ke los gregos no empleavan pinyones (çam fıstığı) gizando las dolmas; ma los ermenis los empleavan. Puedesh entender de ken son gizadas las dolmas? Si son kon pinyones de los Ermenis, si son sin pinyones de los gregos. Los Djudios las gizan de vez en kuando kon pinyones, de vez en kuando sin pinyones. Es el Sinyor Tomo (todos lo yaman kon este nombre); bive en la isla de Burgaz i se yama Yetvart Tomasyan. Este sinyor orijinario de Yedikule, bivio dospues en Bakırköy. Se enteresa kon todo modo de komidas, ma es spesyalisto de las komidas del mupak Ermeni. Ya savemos ke normalmente los Djudios no fiestan el muevo anyo Kristyano. I la Sinyora Berta Kumru, orijinaria de Çanakkale, i eskritorya de un livro sovre las komidas de los Djudios Çanakkalelis ke va ser publikado por el Muzeo Djudio mos konto las mezas de Rosh Asana de Çanakkale ande todas las komidas las komiyan dospues de las berahas. Mos konto su nono de la parte de su madre ke tenia un bostan i todos los vendedores de zarzavates empleavan el nombre de su bostan - vedra o no - porke eran las mijores zarzavates de la sivdad. Este modo kon syenes de djente pasimos un diya maraviyozo en la Ada. Alhad era el sigundo diya ma el tyempo no mos izo hatir.
El 17 del mez d’Enero el Museo Djudio esta organisando una pyesa de teatro sovre Sarah Bernhardth. Es una pyesa de John Murrell. Se va djugar en la Sala Fulya de la Munisipalidad de Beşiktaş. Agora esto asperando un ayudo para vender los bilyetos. Kreo ke va ser un teatro reushido. Es la Sinyora Dilek Türker (artista ke resivio el premio del presidente de la Republika - Devlet Sanatçısı) ke tyene el rolo prinsipal. Si mirash en el youtube ya puedesh ver syertos pasajes de sus piyesas. Reelmente una artista muy talentuoza.
La semana ke vyene tenemos un grupo de Israelyanos ke van a vinir a Edirne. Son envitados por el Mayor de Edirne, el sinyor Recep Gürkan. Ken son? El Mayor de Batyam kon un grupo de la munisipalitad. El Presidente de la Itahdut Yotsei Turkiya, el Sinyor Ovi Oktay Roditi Gülerşen i un grupo de los dirijentes de esta asosiation. Vamos embiyar un hazan, ke se va okupar de la kasherut, i ke va organizar las orasyones. Se van a kedar solo 3 diyas i van a tornar myerkoles la tadre a Israel bolando del aeroporto d’Estanbol. Kreo ke es la primera vez en la istoria de este dos payizes, Israel i Turkiya ke un grupo de una munisipalitad va vijitar otra sivdad. Espero ke esto va ser un empesijo.
