Keridos amigos,
Oy vos kero traduizir un artikolo ke eskrivio Riva Essemini, una mansevika ke mos konta kozas muy enteresantes.
Aviya un Rabi ke se yamava Mendel Futerfas. Este Rabi aviya bivido munchos anyos en un kampo de lavoro en Siberiya. Aya aviya konosido un akrobato ke kaminava ensima de una kuedra. El kaminava kon sukseso sin pedrer el ekilibro. El Rabi kontava a su entorno komo el aviya tomado una leson de este akrobato.
Un diya el Rabi demando al akrobato, kualo era el sekreto de su arte. Le demando: “En ke tema kale eksperimentarse, para pueder reushir en tu arte? En ekilibro? En fuersa? En fiksarse?
La repuesta del akrobato lo enkanto muncho. El akrobato le respondyo: “El sekreto de este echo es, ke kale fiksarte siempre a la destinasyon ke vas arivar. No vas a kitar los ojos de la otra parte de la kuedra. Esto es el modo de arivar a tu destinasyon, kaminar komo ke si fuera ensima de una linya derecha, sin pedrer el ekilibro. Ma saves lo ke es lo mas difisil?”
“Kuando vienes djusto en medyo?” le demando el Rabi.
“No” disho el akrobato. “Lo mas difisil es el tiempo de tornar. Porke en tornando, en una chika parte de un segundo no puedes ver el punto de la destinasyon. Kuando no ves el lugar ande vas arivar, es el mas perikolozo tiempo kuando puedes kayer.
La vida es komo una kuedra muy tensa. Kale ke sepash ande keresh irvos. Para arivar kon sukseso kale konsentrarvos a vuestro punto de destinasyon. Kuando vino el tiempo de retornar, mizmo si no vesh akel punto, kale ke vo lo imajinesh en vuestra mente.
Al punto de destinasyon i a a la fin de todos los esforsos de la umanidad, lo yamamos “geula” o salvasyon. Akel tiempo el mundo se va render kuento de su destinasyon i va ayegar al punto al mas evolusyonado.
Los Judios siempre fiksaron sus ojos a la destinasyon. Esta karakteristika les dyo la fuersa de avansar kon sukseso, malgrado todas las difikultades.
La Geula se topa aryentro de mozotros, aya la puedesh ver. Tiene relasyon kon vuestra mision divina. Si puedesh konsentrarvos en eya, puedesh avansar mizmo en la eskuridad, sin tener espanto.
