Dr. David Azikri/Israel
Coya era la mas grande de las tres kriyaturas de la famiya Azikri. Yo so el chiko i tengo 77 anyos de edad. Ansi ke yo tengo 12 anyos de diferensya kon Coya.
Se puede dizir ke kuando yo nasi, tuve un grande mazal de tener 2 "madres": Mi mama, Mari i otra una "mama" chika de 12 anyos. Esto empleando este titulo porke el mas grande del tyempo de mi chikes lo pasi kon Coya. I tengo memoryas muy dulses de esta epoka de mi vida. Akel tyempo no aviya mestra i yo estava en kaza todo el dia. Me akodro muy bien ke Coya me embezo a desinar, a kantar, a eskrivir i a meldar. Ya puedo dizir ke tuve una eskola privada. I ansi empesi a la primera klasa byen preparado.
Malgrado los anyos ke pasaron, la pasion de estudyar no la desho a Coya. Esto fue enforsado de mas kuando empeso a eskrivir en el Shalom i en El amaneser. Para mi fue un grande gusto i alegriya de meldar los artikulos de Coya.
Malgrado la distansya ke mos separava, eya en la Turkiya, yo en Israel, durante todos estos anyos, mantuvimos el kontakto, a vezes kon viajes mutuales, letras o telefon.
Coya, mos vamos a eskarinyar de ti muy muncho.
Ke tu alma repoze en paz, en Gan Eden.
