En un klub de lektura sekreto de Kabul, kaji una duzena de ijikas se estan konsolando en meldando el diario de Anna Frank.
Arzu, una de las partisipantes, disho ke era la primera vez ke meldo el diario de una ijika ke bivio en grande difikultad.
Kuando los talibanes tomaron el poder en Afganistan, utilizaron fuersa para limitar la edukasion i kuriozidad de las ijikas. Fue prohibido por eyas de ir a la eskola segundaria, les disheron ke se serren i ke keden en kaza. Ma en un klub de lektura sekreto en Kabul, las ijikas kontinuaron a meldar i estudiar.
Un diya enkontraron el livro de una ijika de un tiempo i de un lugar diferente, ke tambien era ovligada de bivir su vida en sekreto. "Eya tenia esperanza. Estava luchando. Estava estudiando. Estava rezistiendo a su destino", dicho Zahra.
Las ijikas se estan arekojendo un dia de la semana, en el susol de un edifisio en una kaleja lateral afuera de Kabul. Dos mansevas volontarias las estan edukando, estan dirijando la konversasion i les estan demandando kestiones. Las chikas estan meldando i diskutiendo el famozo diario de Anne Frank, ke eya empeso a eskrivir kuando teniya tredje anyos. Se estan sorprendiendo de los paraleles: Komo eyas, Anne era una ijika ke aviya empesado a konoser el mundo, kuando fue ovligada a eskonderse por modo de un governo violante i opresor.
Kuatro voluntarias krearon este klub de lektura para las ijikas despues ke los talibanes tomaron Afganistan. Estan empleyando solo los primeros nombres de las ijikas para protejerlas de los talibanes. Se estavan espantando ke los talibanes puedian serrar el klub de lektura i puediyan punir las volontarias por edukar a las ijikas.
Las ijikas aviyan sovrebivido las bombas suisidaras en los ultimos anyos. Algunos fueron eridos; otros sufrieron danyos psikolojikos. Algunos aviyan pedrido sus famiyas. Otros aviyan pedrido sus amigos. Todos apartienen a una minorita etnika yamada hazaras. Bivir debasho del governo de los talibanes aviya adjustado a sus difikultades.
Los kuatro voluntarios son ombres i mujeres, mansevos ke aviyan lavorado en edukasion i en los servisios komunitarios durante anyos. Estan elevando las ijikas para ke puedan salir a bash kon los eventos de sus propia vida. A traves la lektura i la konversasion sovre los klasikos de la literatura persa i oksidental traduzidos al farsi, keren amostrar a las ijikas komo otras minoridades aviyan sovrebivido la persekusion. ‘El diario de Anne Frank’ es uno de estos livros. Este livro ke fue tradusido a mas de 70 linguas i vendido 30 miliones de kopias, fue tradusido al farsi por un refujiado afgano de 61 anyos yamado Khalil Wedad ke bive en los Paizes Bashos.
