Se dize ke en la vida todo troka. La koza ke no troka es el trokamyento. La mizma koza por la ermozura. Eya troka en kada epoka ama el konsepto nunka troka. No savemos si en la epoka de piedra la ermozura era emportante ama en la antikuedad eskrita tenemos munchas provas de la nosyon de ermozura.
En el “Bereshit” tenemos la istorya de Yaakov ande esta eskrito: "Lea tyene ojos delikados, ama Rashel es ermoza de puerpo i de kara”. El rey David se ennamoro de BatSheba ke era la mujer de Uri el Heth (Hitit) porke era muy ermoza. En “Shir aShirim” meldamos: “Sos tan ermoza ke no tyenes dingun defo”.
En Gresya de la antikuedad, la mujer deviya ser un poko godrika, no ser bronzeada del sol, ama era konsiderada komo una kopya mal echa del ombre. Es dizir ke la ermozura avlava en jeneral del ombre. Porke la ermozura del ombre era la bendisyon de los dyozes. Esta emozura del puerrpo del ombre guadrava la ermozura de su alma. Si una persona es ermoza, esta persona es una buena persona. Kreyo ke la konsepsyon de ermozura en akeya epoka se bazava sovre la natura de los animales ke por eyos tan byen la ermozura esta en los machos i no en las embras komo el leon i la leona, komo el gayo i la gayina, komo el pavo real ke tyene una kola enorme kon miles de ojos ensima de mil kolores paresyendo a un asoplador, i la embra no la tyene. Las mujeres utilizavan vinagre para aklarar los kaveyos, lo ke aziya pedrer kaveyos i por esto empleyavan perukas postijas. Los kaveyos largos eran muy apresyados, ama solo las mujeres de la alta aristokrasiya teniyan el derecho de tener kaveyos largos.
En China, las mujeres devian de tener pyezes muy chikos; por esto metiyan bandeletes a los pyes desde la edad de los 5-7 anyos. Se arapavan las sejas para markar kon una linya de kolor diferente o kon una tinta preta ke se yama tinta china. El kuero lo deviyan de tenerlo muy palido tal komo es la moda oy en diya en este payis.
En Ejipto la ermozura de las mıjeres era de ser fina de todo el puerpo. No deviyan de tener ningun pelo i se metiyan syempre peruka en la kavesa.
La ermozura del ombre era de ser delgado i byen formado. Los godros eran konsiderados komo klasa inferyor. Tener barva i mustacho era verguensa i se konsideravan komo trefa. Tener un espejo era una gran moda para ombres i mujeres.
Makiyaj ke, ombres i mujeres se aziyan al rededor de los ojos serviya tanbyen a dar una proteksyon kontra las bakteriyas formadas de tanta kalor i kontra la luz tan fuerte del sol. Nombres de mujeres komo egzemplo de ermozura en Misrayim, savemos Kleopatra i Nefertiti. No tenemos ninguna prezentasyon de Kleopatra a parte de Elizabeth Taylor ke djugo su rolo.
ELIZABETH TAYLOR EN EL ROLO DE KLEOPATRA
NEFERTITI
Ama savemos muy byen ken era Nefertiti. Por eya se dize ke teniya una vista muy moderna komo una mujer ermoza de oy, una verdadera art deco. (Moda de los anyos 1920...) Eya kumple perfektamente las dogmas de una mujer ermoza de muestra era.
En el imperyo Romano konosemos la mujer Romana a traves del Poeta Ovid ke bivyo aze dos mil anyos. El dize ke la mujer Romana deve ser palida, kon karas rozadas, kon ojos pretos, sin perfumes sovre el puerpo. Deviyan de makiyarsen solo para reenforsar sus ermozura natural. Los ombres deviyan de tener kaveyos kurtos, deviyan de araparsen barva i mustacho komo en Ejipto i deviyan de irsen a los banyos romanos todos los diyas.
LA MUJER ROMANA
