Ay anyos ke la Komunidad Djudia d’Estanbol asiende en una noche de Hanuka, la Hanukiya en un diferente kuartier d’Estanbol, en la kaye. La primera vez era en Ortaköy, djusto debasho de la meshkita d’Ortaköy; dospues dos anyos en la villa istorika Esma Sultan. Era un lugar mas siguro. Dospues la Hanukiya fue asendida en Galata djusto debasho de laTorre de Galata. Dospues kon la munisipalidad de Kadıköy en el park de Fenerbahçe. El anyo pasado estavamos en Balat i era una aktivitad realisada kon las Munisipalitades de Fatih i de Beyoğlu. Kreo ke un anyo no lo realizimos porke la Corona estava bastante ancha. I este anyo en el Parko de Bebek kon la munisipalitad de Beşiktaş. Todos los mayores de Beşiktaş, Kadıköy i Beyoğlu estavan aya. El ayudante del Governador d’Estanbol partisipo i mos fiesto la Fiesta de Hanuka. Es por la primera vez ke la mueva ambasadora Israelyana, Irit Liliane estava en Estanbol kon la Komunidad Djudia dospues ke fue nominada komo ambasadora. Aviya munchos diplomates, Konsules i reprezentates de los Konsulatos. Ofisiales del Ministeryo de los Echos Estranjeros. I munchos miembros de muestra Komunidad. Todos estavan yenos de emosyon komo kada anyo. Malorozamente muestro Hahambaşı no pudo partisipar. Estava kon Corona por la segunda vez. Ma mos avlo online i tuvimos el plazer de oyerlo. I kada kandela fue asendida por grupos diferentes. Antes de la seremonia tuvimos el plazer de oyer munchas kantikas en ebreo i syertas kantikas de Hanuka. Dospues de la seremoniya mos ofresyeron sufganiyotes. En mi chikes no komiyamos sufganiyotes en la fiesta de Hanuka. Ma oy en diya es mas fasil de toparlas. La semana pasada el Muzeo Djudio organizo tures Djudios en Balat i Galata. I a la fin en el Muzeo avia sufganiotes para ofreser a los partisipantes. I mizmo eyos fueron muy kontentes.
Oy, anyos dospues se realizo las eleksyones de las Fondasyones Djudias de muestro payis. De Estanbol i de otras sivdades komo Ankara, Antakya, İskenderun, Çanakkale, Kırklareli i en Estanbol, Haydarpaşa-Caddebostan; Neve Şalom; Ortaköy; La Fondasyon del Gran Rabinato; Hasköy; Balat; Kuzguncuk; Büyükada; Sirkeci… No se si me olvidi una o dos.
Es la semana ke viene ke vos va dar syertos detalyos sovre las eleksyones. Vos puedo dizir ke solo en Çanakkale avia dos listas. Serka de 1.550 miembros de muestra komunidad fueron a dar sus votos. Hayirli ke mos se aga los resultados.
