La sivdad Linz de Austria disho ke va trokar el nombre de la kaye Porsche por modo del pasado del fondador nazi, Porsche, ke es el nombre de una marka de otomobiles luksiozos.
Una komision investigando nombres kontrovertidos, enkontro ke el pasado nazi de Porsche era "problematiko".
En las ultimas tres dekadas, el pais empeso a egzaminar seriozamente su rolo en el Olokosto. Un tersio de la populasion judia, fue asasinada en el Olokosto.
La Porscheweg i otras tres kayes van a trokar de nombre en Linz. Se esta asperando ke el Senato de la sivdad va afirmar el trokamiento de nombre este mez.
Linz enkargo una komision de sesh ekspertos en 2019 para investigar los nombres de las kayes de la sivdad. En su raporto publikado en noviembre, la komision enkontro 64 nombres "problematikos". Los 61 ombres i las 3 mujeres, eran miembros del partido nazi. Mezmo ke no eran aktivos, estuvieron aziendo la propaganda de la ideolojia nazi.
Aparte de Porsche, los otros tres nombres ke la komision esta pensando ke son partikularmente "defektuozos" - i por modo de esto se van a trokar los nombres - son el kompozitor Hans Pfitzner, el animator Franz Resl i el papaz Johannes Maria Gfoellner.
Munchas kayes en Austria fueron renombradas despues ke se deskuvrio ke eran rasistas, o onorando figuras istorikas antisemitikas.
Dezeamos ke i los otros paizes agan la mezma koza ke Austria esta aziendo.
