Kuando Shelomo Hamelech suvyo al trono en los anyos de 10 siglos antes (A.J.), el payis konosyo una epoka de pas i de anchura porke el padre, el grande rey David ya aviya kombatido kontra los enemigos de Israel i aviya aparejado un kamino de derechedad, de unidad i pas para su ijo, Shelomo, bien konosido en la istoriya mondiala.
Shelomo, komo ya lo savemos, era el ijo de David i Batsheva i se nombrava tanbien Yedidya (amado del Dio). El suksedo a su padre a una edad muy chika (13-15) sigun los eskritos, dainda en vida de su padre. El Rey David dyo a su ijo todo modo de reglas politikas i sosyalas, i antes de espareserse de este mundo, le desho komo sava otros enkomendamientos primordialos. “En primero de todo, mi ijo, ke seyas obedisyente a tu Dio Santo i ke kamines en su ley”.
Despues de la desparisyon de su padre David, Shelomo suvyo al sanktuaryo de Gabaon para prezentar sakrifisyos, i aya vido una vizyon santa. El Dio se aparesyo en su esfuenyo i le demando lo ke dezeya i Shelomo le respondyo: “So dayinda muy chiko sin dingun saverisyo. Dame Sinyor Dio un korason puro ke pueda djuzgar kon derechedad a mi puevlo i apartar lo bueno de lo negro”.
Porke Shelomo no demando rikeza, largos diyas i vengansa kontra sus enemigos? El Dio le akordo tanbien rikeza, gloria adjustada a la hohma ke aziya vinir de kuatro partes del mundo. Reyes, prenses i altas personalidades i mizmo la reyna de Saba ke vino de sus leshanas tierras kon oro, diamantes i aromates. Todos viniyan para oyer de su boka, las mas altas ideas de saverisyo, era yamado A HAHAM MI KOL ADAM (el haham savyo entre todas las personas). Se diziya ke de su boka saliyan perlas, ke el konosiya mizmo las linguas de las bestias, de las plantas i de los arvoles.
Agora kontaremos una chika konsejika sovre este grande Rey. A todos los ke le demandavan el sekreto de su hohma, de su alta sensya, Shelomo mostrava su aniyo, i kitandolo de su dedo aziya ver los sinyos gravados al enterior. El rey mostrava tres letras. (GZY). Gimel Zayin Yud. Estas tres letras son las primeras letras de tres biervos, Gam Ze Yaavor. I esto pasara. Kuando me siento muy triste i en la amargura, me digo i esto pasara. Diyas buenos vendran i despues de la eskuredad vendra la aklaredad i kuando esto en la alegriya penso ke esto no puede turar. Esto es el sekreto de mi saverisyo i sensya.
Ansi pensaremos i kaminaremos en los pasos de este grande rey, el savio de los savios, Shelomo Ameleh.
