La semana pasada vos dishe ke vos va dar syertos detalyos sovre las eleksyones. Ma kreo ke no ay munchos detalyos. Ya me ambezi ke en syertas fondasyones syertos miembros ke lavoran para el Gran Rabinato i su fondasion fueron miembros en la mueva administrasion de syertas fondasyones i todos fueron elijidos. Komo aviya solo una lista en las 13 fondasiones, los mansevos no vinyeron para votar. Kuando vemos ke ay dos o mas munchos kandidatos, esta vez todos korren para sostener uno de los kandidatos. Penso de la mizma manera.. La demokrasia, si la keremos, se realisa kon diferentes ideas i kon diferentes kandidatos. Los dirijentes de oy preferaron de formar una lista kon personas ke tyenen diferentes ideas.
La semana pasada, diya de Martes me fui a Edirne kon muestro prezidente igual, İzak İbrahimzadeh para estar endjuntos kon el Mayor Recep Gürkan de Edirne i el Mayor de Batyam, Tzvika Brot i sus amigos del konsilyo. Kon eyos, la Itahdut Yotsei Turkiya enkavesada por el sinyor Ovi Roditi Gülerşen se toparon en Edirne. Kuando estavamos kon eyos, en primero vijitimos la sinagoga istorika de los Yemişçis ke se topa en Kaleiçi serka de la Grande Sinagoga. Es la Munisipalidad ke va restorar este edifisyo kon el apoyo de un Fondo Evropeo. Vamos ayudarlos para formar una kaza Djudia ke va ser vijitada komo un Muzeo. I en el segundo etaj, vamos a formar un midrash tal komo egzistiya 115 anyos antes. Dospues de esta vijita, mos fuimos a la Grande Sinagoga ande avia un konserto de la orkestra sinfoniko de la Munisipalidad de Edirne. Kantaron i tanyeron dodje kantikas en ocho linguas diferentes ke eran las linguas ke avlavan los miembros del konsilyo de la Munisipalidad 130 anyos antes. Kantaron en Ebreo, en Judeo-Espanyol, en Grego, en Bulgaro, en Rumeno, en İtalyano, en Ermeni i en Turko. Reelmente fue un konserto reushido. El konserto s’eskapo kon el kante de Hava Nagila de los dos mayores.
Alhad era el primer diya del anyo muevo kristiano. I el tyempo estava una maraviya kon 14 grados de kayntura. Tuvimos la okazyon de ir al Bosfor para pueder kaminar a la manko kuarenta puntos.
Estuve muy kontente de oyer ke el diya de muevo anyo en Paris mas de un milyon de personas estuvieron en los Kampos Eliseos. I en Estanbol, todas las plasas, los restoranes i todo modo de lokales estavan yenos para patladear mizmo si los presyos estavan 3 vezes mas karos (en liras turkas) de el anyo pasado.
El 8 de este mez va ser musafir en el enkontro de Alhad kon la balabaya Rachel Amado Bortnick ke va ser muestra envitada este anyo para el Diya Internasional del Ladino. Vos asperamos.
