Todos ya konosemos a Albert Einstein. No solo mozotros ma el mundo entero lo konosen por ke era un savio de grande entelijensya. El topo “La Teoriya de la Relatividad”. Fue una topadura ke ayudo a adelantar la matematika superiora i las siensas pozitivas, komo la fizika teorika. El era muy entelijente, teniya el IQ (koefisiyente entelektual) entre 180 i 220, ke es una entelijensya muy rala. Ma no vos vash a kreer, este genio era un mal elevo kuando era chiko.
Einstein aviya eskrito una letra al Prezidente de la Republika de Turkiya, İsmet İnönü para ke la Turkiya akseptara los profesores judios de grande valor, a su payis, en los anyos ke governavan los nazistos en Alemanya i los judios pasavan diyas muy tristes i malos ke los estavan matando kon miles i milyones. I es ansina ke la Turkiya gano munchos profesores valorozos ke adelantaron las universitas i la siensa.
No vos va avlar mas muncho de las kualitades de Einstein. Esto es un sujeto aparte i muy profondo. Yo vos kero kontar un evenimyento enteresante de Albert Einstein.
Einstein era profesor i dava lesones en la Universita. Un diya eskrivio al tablo: 9x1=9, 9x2=18, i ansina kontinuo asta ke eskrivio 9x10=91. Todos los elevos ampesaron a riyirsen. Por ke Einstein aviya echo un yerro. Por ke 9x10 aze siguramente 90 i no 91. Se estavan burlando del profesor. Einstein aspero ke la klasa se kalme i ke se esten kayados i disho: Kuando eskrivi los primeros mueve prosesos ke eran djustos, dingunos de vozotros no me felisitatesh. Ma kuando ize el primer yerro, ampesatesh a riyirvos. Esto kere dizir ke mizmo si sosh una persona ke reusho muy bien en la vida, la sosyeta remarka pishin la mas chika falta. Por esto, la leson de oy es: Las erores azen parte del proseso. La persona ke no aze nunka yerros, es la persona ke no aze nada en la vida i no aprova nada de muevo. Efektivamente akeya persona no yeva dingun risko de yerrarse.
ERRARE HUMANUM EST… Komo dizen en Latino.
