Los Ejipsyanos, vyendo ke kon todo ke estan afriyendo a el puevlo djudyo, kon esta fuerte i dura ovra, no estan puedyendo valir kon eyos. Kuanto mas los afriyiyan i apezgavan sus sirvimyentos en los kampos i en las kazas, mas se avian muchiguado i enfortesidos. Le dyeron avizo al rey para ke dé una idea ke manera valir kon este puevlo i atemarlo enteramente. Despues de azer un konsilyo sovre este echo, desidaron entre eyos, de azer matar todos los ijos ke nasen de este puevlo i al punto mando a yamar a las komadres kaporalas ke resivian a las parideras djudiyas ke se nombravan Shifra i Pua i les enkomendo ke kuando resiven a los nasidos de los djudyos, si ven ke es ijo, ke lo maten sekretamente, si es ija ke la deshen biva i kon este envento pensaron de atemar a el puevlo djudyo.
Pero, el Kriyador no estuvo de akordo kon este mal pensamyento de los ejipsyanos, i las dichas komadres espantandosen del Dyo santo, no dyeron ninguna importansa a la enkomendansa de Paro i arebivian a los ijos.
Paro no se deskorajo por esto de su negro penseryo, i sovre el konsejo de Bilam i del resto de sus savyos, se permetiyo de enkomendar klaramente a su puevlo, ke todo ijo ke les nase a los djudyos ke lo echen al rio i solo a las ijas ke las deshen bivas. Estonses, uvo una diferensya de ideas entre el puevlo djudyo. Uvo entre eyos ke se apartaron de sus mujeres por no ser kavzantes de matarlos a los ijos ke les van a naser. Pero uvo tambien personas ke no lo toparon esto de djusto i eyos aziyan su dover. Kuando viniya ora da parir, sus mujeres aziyan todo lo posivle por eskapar a sus kreaturas de la muerte, kualos los enkondian en sus kazas, i kualos los deshavan en medyo los kanpos enfiuzyandosen en el Dyo ke tendra sus kudyado.
Amram estava de la primera idea, despues de averle nasido una ija nombrada Miryam i un ijo ke lo nombro Aaron, se espartyo de su mujer sovre el konsejo de Miryam, su ija. Amram tomo de nuevo a su mujer Yoheved i despues de 7 mezes en el 7 adar de este anyo le nasyo un ijo. Ke fue Moshe Rabenu.
