Lunes demanyana mi primer dover era de partisipar a la Seremoniya de Tefilin de Daniel Çiprut. Ken es este mansevo? Daniel es el ijo de muestro kerido amigo, Henri Çiprut ke mos desho la vida un anyo antes. Henri era muestra esperansa. Porke era uno de los mas mansevos ke se enteresava en muestra lingua, el Djudezmo. Kreo ke su famiya konosen esta lingua i Henri era un potansiel muy emportante para muestra asosiasyon. Gan Eden bueno ke tenga.
Oy esta seremoniya se realizo en el Kal de los Frankos ke se topa entre la kaleja Büyük Hendek - ande se topa el Neve Şalom - i la kaleja de las Bankas. Esta kaye se yama el Yokuş Şair Ziya Paşa. Daniel vino a la Sinagoga kon su madre, su Granpapa Daniel i su Granmama.
El Kal de los Frankos es muy emportante en la istoria de los Djudios Estanbullis. Ya savemos ke es el Kont de Kamondo dospues ke fue ekskomunikado de muestra komnunidad porke el era el fondator de la primerra Eskola Laik en Estanbol en el Emperio Ottomano. Dospues del “Herem” ke realizo los Rabinos Ekstremistos; kon la proteksyon del Rey de la Italia fondo la Komunitad de los Frankos formada por los Djudios ke no eran de Nasyonalidad Otomana. Mizmo dospues resivyeron el Simiteryo ke se topa en Şişli. I este Simiteryo fue dado por el Sultan Abdulhamit a esta Komunidad. Por esta razon durante la bendisyon de “Anoten”, el hazan bendize al Presidente Turko i al Rey Italyano.
Oy durante la Seremonia bushki syertas personas del Şalom. Ma malorozamente no aviya dingunos. I eskrivi immediamente a mis amigoıs del Şalom i me disheron ke no tenian haber. Kreo ke es mi kulpa. Kuando resivi esta envitasyon puediya demandar a mis amigos si resivyeron esta envitasyon. I si no resivyeron puediya avlar kon Yıldız, la mujer de Henri. Henri; so kupavle porke no propozi a Yıldız de ayudarla….
Malorozamente yo me fui dospues de la seremoniya. Ma komo veygo en la foto, organizaron una otra seremoniya ande Danyel asendyo kon sus envitados las 13 kandelas del shandelier.
Auguro una vida kon salud i yeno de reushitades a Danyel Çiprut.
