La pandemiya i los anyos mos kansaron muy muncho. Tanto ke la vinida de un anyo muevo, no mos esta eksitando komo los anyos pasados. Kreygo ke la anksyedad por el futuro, los insertidumbres espantaron a las personas ke estan muy pesimistas.
Agora estamos arrogando por el anyo muevo solamente muestra sanedad, muestro repozo i la seguridad materyal i moral.
El Dyo puederoso ke no mos aga bushkar el dia ke estamos bivyendo oy…
Oyeremos haberes buenos del entorno.
Estamos en un dor ke semplifiyimos todo. Los anyos mos ambezaron a ser mas simples, a no dar emportansa a los detalyos, a no kansarmos kon bavajadas, a bivir solo el momento, de gastar poko…
Anyos difisiles, eksperyensas difisiles, un mundo roto, ravyas, koloras batires en las personas, evenementos interminables,… no ay kozas ke mos estan kontentando…
Komo va ser el anyo 2023? Todos estan asperando kon kuryozidad.
En los anyos presedentes aviya un entuzyasmo, illuzyones, una lista de dezeos. Kualo azeremos, ande mos iremos, planes, kualo mos vistiremos…ke regalos merkaremos a los keridos?...
Sovre todo aviya una esperansa.
Kon la pandemiya todo troko, el mundo paso un proseso muy difisil. Nada no va ser komo lo de antes. Despues de las difikuldades todo va ser muy bueno espero…
La varyasyon, la alternansa no es fasil. Un poko de pasensya. No peryer muestra esperansa…
El dia del anyo muevo es un festival ke se selebra en la grande partida del mundo el 31 disiembre. La selebrasyon de este dia es una tradisyon kon las kumidas, los fuegos artifisyales i la refleksyon kon los amigos i famiya ke son los elementos komunes.
Las kayes de las sivdades grandes se illuminan kon las luzes… Es un momento endikado de reunirse kon los keridos, amigos, kompanyeros del echo para selebrar
la amor, la amista i ogurar la sanedad i la parnasa tova.
La esperansa es el derecho de todos, es la motivasyon de la vida.
Lo ke keremos, lo ke suetamos del anyo 2023, lo mas emportante es la estabilidad del pais, en todo modo de punta de vista…
Esto ogurando ke el anyo 2023 mos trayga la sanedad, la felisidad, el kalmo, la unyon, la solidaridad i la pas al mundo entero.
Ke muestros ijos, ijas, inyetos ke bivan en un mundo ermozo kon alegriya, sin gerras i hazinuras…
Ke nunka la LUZ de la ESPERANSA no manke de muestra Vida… AMEN…
