Un anyo muevo, 2023. Kuando selebramos el anyo muevo o una fiesta, todos rogamos al Dyo Santo, sovre los dezeos ke tenemos. Alegriya, una vida mas mijor, estar kon muestras famiyas,
kon muestros amigos, todos en buena salud i orozos. Pasan los diyas, entramos yene a las mismas ansyas, penas, sehoras.
La vida vyene kon sus esforsos, ke te ovligan de ser mas ermoza, sin rigas en tu kara, un puerpo fit, kon vistidos a la moda, fotos en bodre de la mar, en los mijores lugares todos riyendo, keres una kaza mas grande, un oto mas bueno… La media sosyal i los reklames estan inchendo la subkonsensya de todos. Chikos o grandes. Los chikos no se estan artando de djugetes i los grandes de mas i mas bavajadas.
En fin, para esto todo, para alkansar, se kere mas muncho ganar, se kere mas muncho lavorar, se kere lazdrar. Se dize “todo lo lazrado para Chelebi Merkado”. I despues todo lo ke arogimos para la anyada mueva, salud, estar kon muestra famiya, kon amigos kerensyozos, piedren la importansa. Porke todos estan kansados.
El Profesor Acar Baltaş en un artikolo suyo, mos dize: una vida feliz, no pasa en bushkando el plazer i el entretenimiento, pasa en topando, bushkando el sentido mayor de tu vida. Estos son: la famiya, el echo ke se aze kon kerer, la natura o la kreensa. Para munchas personas, ir detras del plazer i del entretenimiento, konsyente o no, es mas valutozo de ir de detras de su sentido. La media sosyal o djugos kon paras son impulsos.
Tener un senso para tu vida, es tener una perspektiva sovre tu vida. Es una mentalidad alta.
Un konsejo chiko de Rabbi Lord Jonathan Sacks. Sir Moshe Montefiore en el siglo 19 era un filantropisto famozo (1784-1885). La reina Viktorya para onorarlo le dyo el titolo “Sir”. Era el lider de Londra i el lider de la union Djudia Britanika. Era muy riko. Bivyo orozo i largo fin a 101 anyos. El konstruyo la primera kaza de proves i el Molino grande en Yerushalayim. I esto todo dayinda se konosen kon su nombre. Para onorlarlo se izo una kantika en su nombre ke fue kantada por Yehoram Gaon.
Un diya al Sir Montefiore le demandaron “kualo es tu valor?”. El, les respondiyo unos shifros. Disheron “no es posible. La valor tuya es mas muncho.”
Les disho: no, yo ize kuento, solo lo ke di. El valor muestro se ve, si estamos prontos a partajar o no. La valor i la felisidad de la persona, es solo lo ke partaja kon su entorno. Keridos lektores, vos oguro anyada buena, enrikesyendo en partajando, i en este kamino ke puje vuestras felisidades kon salud buena, i kon amigos kerensyozos. Pujados i no amungados. Amen.
