Este viernes se avryo la mas grande biblioteka de la Turkiya en Rami, Estanbol. Este lugar era antes 250 anyos la kazerna de artileriya “Topçu kışlası” de Rami. Este edifisyo fue konstruido antes 250 anyos en el tiempo del Sultan III. Mustafa, por su vizir, ke era el vizir Rami Mahmet Paşa. El edifisyo fue konstruido para ke se aga una kazerna para los soldados del Sultan, kon el nombre “Asakir-i Mansure-i Muhammediyye” ke kere dizir “Los soldados ke tuvieron el ayudo de Allah”. Munchos anyos despues en el tiempo del Sultan II. Mahmut fue restorado i esta kazerna fue empleyada fin al anyo 1960. En al anyo 1980, fue entregada a la Munisipalita de Estanbol, ke la empleyo komo Otopark, tereno de futbol i de spor, i tanbien depo de alimentos.
El kurator de este projekto, Osman Zorlu konto ke en lo ke tomaron este projekto en mano, todo estava en ruinas. I lo ke toparon de al tiempo, lo restoraron komo un puzzle, i metyeron kada koza a su lugar para ke seya komo la struktura orijinala.
Esta biblioteka fue nomada “Biblioteka sertifikada” i ay lavoros para ke seya inkluida en la lista del Patrimonio kultural del Unesco.
De lo ke mos ambezimos de las medyas, la guerta de este komplekso kontiene 51.000 metros kuadrados de tereno i 36.000 metros kuadrados de biblioteka. Ansina es la biblioteka ke tiene la mas grande superfisya jardinada de la Evropa. En este komplekso ay 4200 lugares para personas i kontiene: Biblioteka para kriyaturas, para la manseves, para estudiantes de lise, para estudiantes de universita, para estudiantes de doktora, livros espesiyalizados por filozofiya, psikolojiya, siensia, sosyolojia, linguistika, teknolojiya, arte, literatura, istorya, jeografiya i tanbien una biblioteka espesiyalizada sovre Atatürk i una biblioteka de manuskritos. Se topa tanbien livros de personajes emportantes komo los livros de Fatih Sultan Mehmet.
Aki se topa la mas grande biblioteka en la Turkiya, de livros de Atatürk ke kontiene 20.000 livros.
Aparte de esto, en una parte se topan personas kalifikadas ke restoran los livros arazgados u mankos.
Esta biblioteka vas ser avierta 24 oras. Los ke dezeyan i tienen ambre durante sus estudios en los livros, pueden bever chay, kafe, supa, pueden tanbien komer biskochos o kek, sin dar un grosh, todo debaldes.
El buto de este komplekso es de auzar a las kriyaturas a ke melden livros, al lugar de estar diya entero en las kayes o djugando diya entero delantre de las komputadoras, ke pueden kontener sitios danjerozos.
Antes de eskapar kero adjustar ke esta biblioteka fue inogurada por muestro Prezidente de la Republika, Recep Tayyip Erdoğan.
