Estamos en los mezes kuando los diyas son muy kurtos i las noches largas. Antes de las ocho i medya de demanyana no esta amanesyendo. Komo me esperto muy presto esto kedando ovligada de bever el kafe kon lunar. Komo la sezon, i los haberes estan un poko aleskuro. La politika, los estudyos, la ekonomiya, la djustisya, una pandemiya de influenza, no ay ken no esta tosyendo, kon ken avlo uno de su famiya esta hazino, todo komo todo.
En las novelas de la televizyon, ke no kero ver porke me esta azyendo pena, kuando veyo ke una mujer tomo dos tomates un pedasiko de kezo, keshandose ke ay mezes ke no kome karne, las kriyaturas afritos de munchas kozas.
Portanto, kuando salgo a la kaye, seya para kaminar seya para empleyar, todos los kafes, todos los restorantes yenos, no ay lugar para asentar. En pasadas estuve envitada a un muzikal, (JEKYLL & HIDE) para ser entre semana i los bilyetos byen karos, el salon estava yeno i en los restorantes del sentro no aviya ni siya para asentar. Este kontraste esta kuryozo.
Por siguro i la komunidad djudiya se arebivyo i empesaron munchas aktividades. Yo de mi en parte, esto oroza ke empesimos a azer teatros i konferensyas en bivo ma munchas vezes no estamos alkansando, porke en una noche tres programes i en una semana teatro, konferensya i otros, no abasta ni la salud ni la aldikera.
Antes munchos anyos, en las ovras, me akodro, aunke ke eramos mas munchos, kuando ivamos a azer una aktividad, davamos el program i las datas a los deputados, eyos organizavan las datas para ke no kaygan o en mezma noche mezmo en mezma semana. Agora, mozos pokos, las aktividades munchas. Por egzemplo se va fyestar la fyesta de Purim, Purim es dos diyas, se fyesta vente noches. Lo mas ermozo esta la noche de alkavo de Hanuka, kada anyo en un lugar, una ves i buena. En fin alegres estaremos syempre ke ayga fyestas i alegriyas.
No mos demoralizaremos de las novelas negras. Todo se va azer bueno. “Tanto eskurese es para amanser”.
