“Es una observasyon ke kualker persona ke mantyene el poder, no se detyene de abuzar” diziya Montesquieu en su famozo livro “Del Espirito de Las Leyes”. El filozofo Alain dize “Kada poder sin kontrol traye la lokura”. Egzemplos de abuzo de la parte de personas detenyendo una otoridad o un poder sovre otras personas no son raros: Eskandalos de finansya, de djustisya, abuzo seksual, psikolojika, o fizika, abuzo en la politika, en la prensa o kanales paresidos, abuzo en la polisiya, inkluzo en la relijyon. La kestyon es de saver si la persona ke detyene el poder abuza porke este komportamyento se baza sovre el narsisizmo (estado de una persona ke se ama a si mizmo o a su intelijensya), sovre la psikopatiya (estado de una persona ke puede kometer un delito) o sovre la megalomaniya (estado de una persona ke amostra grandeza)
Los estudyos mos muestran ke kualker persona ke detyene el poder, puede tener una manera ke le favoriza a adoptar un komportamyento negativo. Munchas vezes observamos ke el komportamyento de una persona ke konduiza una araba muy kara, es mas mal ke el komportamyento de una persona ke konduiza una araba modesta en aspekto de observar las reglas del trafiko. Un otro estudyo se pratiko entre elevos ke eskriven las reglas ke keren para la universita. Uno de estos elevos esta separado para supervizar. Los elevos deven de ser rekompensados al final kon unos biskochos muy savrozos. Los biskochos son limitados. Ay solo un biskocho de mas ke los partisipantes. Se vido ke fue el supervizor ke se komyo los dos biskochos. Filmaron en diskreto este akto i notaron ke el supervizor se komyo los biskochos kon manka etiketa ke los otros. Repityeron este estudyo kon diferentes elevos i vyeron ke el komportamyento de los supervizores fue kaji el mizmo.
En la istorya de las Syensyas Politikas, tenemos munchos egzemplos de dirijentes ke trokaron sus personalidades detenyendo el poder. Ay ke dar razon a Montesquieu ke diziya, “Para evitar fines malas, es mijor de pensar a tener un poder dividido i partajado”. O “Permetir a una opozisyon ke te va kritikar i te va amostrar los defektos”. Esto kere dizir la Separasyon de Poderes de la Lejislasyon (azer Leyes), de la Egzekusyon (pratikar las Leyes), i de la Djustisya.
No olvidar ke munchos yaman el Poder una Hazinura komo lo vimos en los responsavles de la Shoa.
Fuente: National Library
