Keridos lektores, de vez en vezes, esto preferando eskrivir sovre los evenimyentos importantes en la istorya Djudia. I este mez, Enero, es el aniversaryo de un evenimyento muy importante, ke se puede dizir troko la vida de los Djudios.
“I fue en el mueven anyo del reynado (del Rey Zeddekiah), en el dyezen mez, a los dyez (dias) del mez, ke Nabukodonosor, rey de Babilonya, vino kon todas sus lejyones i armada sovre Yerushalayim, i izo su kampo serka de la sivdad i konstruyo fortifikasyones al doredor. I la sivdad estuvo enserklado asta el onzen anyo del rey Zeddekiah. El mueven dia del mez [de Tammuz] la ambre era muy intensa en la sivdad, el puevlo no tenia pan para komer, i la sivdad estava abatida. I todos los ombres de gerra [fuyeron] de noche por el kamino de la puerta entre los dos muros ke estava al lado de la guerta del rey, i los Kaldeanos estavan entrando a la sivdad, i el (Zeddakiah) se fue por el kamino de Arava. (II Melachim - II Reyes 25:1-4)
Enserklamyento! La palavra sola mos esta dando une idea de amargura i sufrimyento. En el kavzo del enserklamyento de la sivdad de Yerushalayim por los Babilonyanos en 587 antes de Yeshu, tambyen fue el empesijo de la fin.
Apenas vensido el gran imperio asirio, el rey de Babilonia, Nabukodonosor, embiyo sus trupas para dezenkorajar i detener kualker rebelyon en la tyerra de Judea, onde el korason era la sivdad de Yerushalayim. El enserklamyento duro un anyo i medyo. Durante este tyempo, la sivdad sufriyo imensamente. La ambre, la mankura de agua, las enfirmedades... todos los orores del enserklamyento se kumplyeron unos despues de otros, komo lo aviya predicho el profeta Yermiyahu:
“Entonses vino la palavra del Sinyor del Mundo a Yermiahu, dizyendo: Yo so el Sinyor del Mundo, el Senyor de todo. Por tanto, ansi disho el Seyor del Mundo: yo entrego esta sivdad en las manos de los Kaldeanos i en la mano de Nabucodonosor, rey de Babilonya, i el la va tomar. I los Kaldeanos ke estan en gerra kontra esta sivdad vendran i empesaran el fuego en la sivdad i la kemaran, ansi ke las kazas ande en los tejados kemaron kandelas para Baal i prezentaron libasyones a los dyos etranjeros para provokarme” (Yermiyahu 32:26 – 29).
El enserklamyento de Yerushalayim fue el primer paso de lo ke se iva yamar el "egzilyo de Babilonya". Kuando los Babilonyanos finalmente pasaron las murayas de la sivdad, destruyeron el Templo Sagrado konstruido por el rey Shlomo. El rey Zeddakiah i sus ijos fueron apanyados i masakrados uno despues de otro. Esta grande trajediya se finalizo kon una otra grande trajediya: la mayoría del puevlo djudio fueron egzilados a Babilonya.
Los grandes savyos relijyozos deklararon el diez de Tevet, el dia en ke empeso el enserklamyento fatidiko, komo un dia de ayuno (taanit) desde el amaneser asta la vista de las primeras estreyas, para apartar un tyempo, durante este tyempo para ke los Djudios mediten sovre sus aksyones i agan Teshuva (arepentimyento).
