Munchos governos koronan artistos, personas de sensya, ombres i mujeres de politika, personas ke ayudan la lingua o otras kozas kon su lavoros, sportivos, ets. I esto es un prestijyo para estos governos i para las personas ke lo resiven. Vemos la mizma koza en las universidades ke dan doktorados onoraryos a diferentes personas komo prezidentes o primer ministros, syertyos ministros, eskrivanos o eskrivanas, artistos i artistas en arte… Ma es la primera vez ke me ambezi ke la Universidad de Ben-Gurion va dar premios al nombre del Prezidente Yitzhak Navon (z"l). En la Universitad ke se topa en Beersheva tyene un Sentro sovre los estudios de la lingua i kultura Sefaradi ke tyene el nombre de Sentro Gaon de Kultura Djudeo-Espanyola.
I la Universitad dyo karar de dar este premio al nombre del prezidente Yitzhak Navon (z"l), ke se yama: Orden de la Kavayeria del Ladino al nombre del Don Yitzhak Navon z”l, el Sinken Presidente del Estado de Israel, uno de los Inisiadores del establesimiento del Sentro i su primer Prezidente Onorario. Navon es el primer Sefaradi ke fue Prezidente del Estado Israelyano.
Ya se ke estash demandando “Ken son esta dos gerreadoras?”. Si los anyos dalkavo puditesh segir el “Renasimiento” de muestra lingua, reelmente Karen Gerşon Şarhon i Liliana Benveniste son las primeras a resivir este premio. I fue este modo. El punto el mas emportante es ke oy en diya dingunos no pueden dizir ke es una lingua i kultura ande no ay dingun adelantamyento. No achetamos esto. Es la semana pasada ke yo fui musafir a los Enkontros de Alhad ke es organizado en primero por Liliana Benveniste i su marido Marcelo Benveniste, mizmo si ay munchas personas ke les ayudan. Era el 111en enkontro. Ya vos puedesh imajinar invierno/enverano solo los alhades ke son fiestas estos enkontros no se realisaron. Si no ay dos anyos i unos kuantos mezes ke todos los enteresados se topan en estos enkontros. La semana pasada aviya mas de 100 personas en el zoom i 37 personas en el face. Ya se save ke se puede segir mizmo dospues del enkontro. Ya vos avli de este enkontro porke esto sigiendo. Ma si no, Liliana tyene munchas organizasyones.
Karen; kreo ke so el ke save lo mas de lo ke esta azyendo. Todos savemos ke es la editora del Şalom (ojas Djudeo-Espanyol) i del Amaneser. Aparejaron un livro de Tintin en Judeo-Espanyol en Espanya, i eya fue la traduktora i editora. Komo era profesora de Inglez en la universitad, le plaze editar todo modo de artikolos i livros. Si le demandan una konferensya dize si immediatamente.
En el empesijo eskrivi puedeser un poko charpeado porke no se egzaktamente lo ke van a dar. Es la semana vinidera ke va pueder eskrivir mas korektamente. Karen i Liliana van a ser nominadas Shovalyes de Ladino en el orden de Itzhak Navon (z"l). Esta seremonia se va realizar el Martes, 17 de Enero 2023, a las oras 18.00 en el W. A. Minkoff Senate Hall Marcus Family Campus, Ben-Gurion University of the Negev.
Karen i Liliana vos felisito.
