En la vida ay problemes de los kualos no avlamos muncho, pensando ke ya se va enderechar, ya se va topar un remedyo. Oy vos kero akodrar un perikolo muy seriozo ke puede tener konsekuensyas muy gravas: La Mankura de Agua.
Ya estamos viendo esta situasyon ke yamamos el trokamiento de las sezones, por modo del kayentamiento global.
Avlaremos de muestro payis i si keresh de muestra sivdad, Estambol.
Ay mezes i mezes ke no tenemos luvyas. Malgrado ke estamos en los mezes ke kale ke seyan los mas yelados mezes del anyo, estamos biviendo diyas kayentes sin luvyas. Mizmo en las estasyones de ski, no tienen bastante inyeve. Estamos en alerta ke las rezervas en los barajes estan para sekarsen por entero.
Komo lo savemos, la agua es indispensavle para la vida de las personas, de las bestiyas i de las plantas. La sekura, el Dio ke mos guadre, puede ser la fin de muestra planeta. Por las oras estamos sin remedyo delantre de esta katastrofa. Todos estan dizyendo ke el klima se esta kayentando, ke ay un burako preto ke esta kavzando muncho danyo, ke los spreyes i los umos de los egzoses estan engrandesyendo este burako. Se aze konferensyas i reunyones, avlastinas i palavras, ma vemos ke no ay dinguna aktividad para aremedyar. Me akodro, unos kuantos anyos antes, en el tiempo ke Nurettin Sözen era el Mayor de Estanbol, teniyamos una sekura semejante. Los barajes se aviyan sekado djusto komo agora. Mos davan la agua kon oras. No demandesh ke difikultad ke tuvimos. Akel tiempo Estanbol no era tan povlado ma, malgrado esto, la agua ke mos davan no mos abastava, la agua no teniya muncha presion, por esto no suviya asta ariva en los apartamentos, eramos ovligados de inchir kuvos del kat de abasho i suvir tantas eskaleras kon kuvos yenos de agua. Akel tiempo toparon un remedyo de empleyar enjeksyones a las nuves i ansina izo luvyas ke se pudieron inchir los barajes.
Mozotros los judios tenemos orasyones para ke aga luvyas. Tanbien i los Musulmanos tienen “yağmur duası”. En Sukot arogamos ke el Dio mos de luvias “bastantes”. Ke kere dizir bastantes? Ke aygan luvyas ni pokas ni munchas, kon karar. La poka luvya no sierve para nada, solo para mojar las kayes. La muncha luvya, komo vemos en los tiempos dalkavo, se azen seles, ke arevatan las personas, los arvoles i mizmo las kazas. Azen munchos danyos. En la Tora, las luvyas tienen diferentes nombres. Yore, Geshem, Matar i Malkosh. Kada uno de estos tienen kalidades i enterpretasyones diferentes.
El otro diya izo un poko de luvya, mos alegrimos en esperando ke va azer un poko de hayre, ma malorozamente mojo las kayes i se fue. Muestra alegriya sureyo poko. Aviya djente ke se keshavan en dizyendo: “Atyo, me va mojar en indome a kaza”.
Ma oy meldimos un haber en las gazetas ke en serka vamos a tener inyeve, ke inshalla mos se van a riyir las karas.
