Todos achetamos ke la mas grande desgrasia ke bivio la umanidad es el Olokosto realizado por los Nazis. Ya savemos ke mas de sesh miliones de Djudios fueron matados o se murieron de diferentes razones. Ma la razon prinsipal era la ideolojia Nazista i sus konsekuensas. Ya se save ke los Karaim reusheron a salvar sus vidas. Ma no fue la mizma koza por los Djudios Sefardim. No tuvyeron dinguna diferensya de los Ashkenazes. En el empesijo del 20 en siglo, munchos djudios de la Turkiya i de la Gresia, kon las negras kondisyones ekonomikas del Imperio Otomano i de la Gresia, konosiendo el fransez kon los estudios de la Aliansa, se fueron a la Fransia i formaron mizmo una komunidad de los sefardim turkanos i gregos. En estos anyos, los 11en i 10en kuartieres de Paris eran las rejyones ande biviya la mas grande partida de estos djudios sefardim.
Dospues ke los Almanes okuparan una grande partida de la Fransia, los Djudios tuvyeron munchas restriksyones en sus vidas. Las kriaturas no se fueron mas a las eskolas, fue muy difisil de pueder lavorar, todos los djudios fransezes devian de meter la estrea amariya ande estava eskrito “JUIF”. I malorozamente empesando de la 11ena rejyon; miles i miles de Djudios fueron apanyados por la Gestapo i los Almanes. En primero al kampo de Drancy i dospues a los kampos de eksterminasion.
La Asosyasion “Muestros Dezaparesidos” dospues de un lavoro bastante emportante publikaron un livro (una ansiklopedia) ke tyene komo titolo “Memorial des Judeo-Espagnols deportés de France”.
La komite de la redaksyon fue formada por: Henriette Asseo; Annie Bellaiche Cohen; Muriel Flicoteaux; Corry Guttstadt; Xavier Rothea; Sabi Soulam i Alain de Toledo. Dos-tres mezes antes Corry vino a Estanbol i prezento al Muzeo Djudio este livro de 720 ojas en un format bastante grande. Avlando kon eya dimos karar de envitar al Sinyor Alain de Toledo para ke mos de una konferensya sovre estos Djudios Sefardim. Kuando? El 27 de Enero. Diya ofisial kuando se komemora el Diya del Olokosto. Ma komo es un diya de viernes i noche de shabat, dimos karar de organizarlo una noche antes, el 26 de Enero. El Sinyor De Toledo va ser envitado a la Universitad d’Estambol ande se va realizar la Seremonia Oficial. Vemos ke la mas grande partida son nasidos en diferentes sivdades de la Turkiya i de la Gresia. La mas grande diferensia kon la Gresia es ke los Djudios Turkanos no fueron embiyados a los Kampos por los Almanes. Syertas personas pueden kritikar la Turkiya por diferentes kavzos komo el Varlık Vergisi ma dingunos no pueden dizir ke el Governo Turko lavoro kon los Almanes para matar los Djudios de la Turkiya.
Amanyana vamos a pueder oyir al Sinyor Alain de Toledo sovre el livro ke fue publikado. Va avlar en Fransez ma tenemos la traduksyon simultanea…
Vos estamos asperando Djugeves el 26 Enero a las 18.00 al Templo de Neve Şalom.
