En el anyo 1961, en Yerushalayim, uvo un djuzgo de lo mas importante en la istorya del puevlo Djudyo, el djuzgo de Adolf Eichmann. Este kriminel alman ke izo matar miles i miles de Djudyos, nunka se puediya imajinar ke despues de 16 anyos ke se eskapo la sigunda gerra mondiyal se iva topar en el Estado Djudyo i ser djuzgado aya. El rolo de este ombre en la Shoa, ya se saviya desde el djuzgo de Nuremberg ande djuzgaron los lideres nazis. Ya se saviya ke desde el anyo 1941, el administrava el maldicho buro IV B4, ke se kargo de los Djudyos. Ya se saviya ke el era el sekretaryo de la konferensya de Wannsee ande 15 lideres del Estado Alman i de la Gestapo desidyeron la suerte de los Djudyos. Ya se saviya ke el mizmo organizo la matansinas de Auschwitz. Ama en 1945, el supo fuyirse del kontrol de los Amerikanos, eskonderse durante 5 anyos en Almanya basho el nombre de Ricardo Klement, i irse a Argentina pasando por Austriya i Italya. Entro en munchos empleyos, se okupo de una lavanderiya en Buenos Aires, por fin se izo mekanisyen el la fabrika Mercedes Benz afuera de Buenos Aires.
En estos anyos pasados en Argentina, el nunka se arepintyo de estar en kontakto kon los nazis eskondidos, inkluzo kon el terible doktor Josef Mengele sin frekuentarlo muncho, ama syempre estando pishman ke no pudo eskapar su ovra de matansina. Klaro ke era una obsesyon para los servisyos sekretos de Israel, el Mossad, de pueder aferrar el kriminel Eichmann i de pueder djuzgarlo en Israel. Por fin fue un Alman de nombre Lothar Hermann ke emigro a Argentina en el anyo 1938, porke fue emprizonado en el kampo de Dachau en Munich, ke deskuvryo a Eichmann ke estava bivyendo en Argentina kon el nombre, Ricardo Klement. Es ke la ija de Lothar era amiga del ijo de Eichmann. Avlandosen entimamente entre eyos, el ijo le aviya kontado a la ija de Lothar, ken era su padre. Lothar embiyo esta notisya a Fritz Bauer, prokurador jeneral de Almanya, i Bauer penso ke era mijor de avertisar el Governo de Israel.
Kuando David Ben Gurion, ke entonses era el primer ministro se ambezo ke se save ande esta Eichmann, izo empesar la operasyon “Atilla” ke konsistiya de aferrarlo. Komo fue planeado, un diya salyendo de su kaza, fue aferrado i fue metido en el bodrum de una kaza alkilada por el Mossad asta ke vino un aviyon El-Al para yevarlo a Israel. Para pasar de las duanas i para ke no seya apersivido por los duaneros, lo izyeron durmir i lo vistyeron komo un ofisyal del El-Al ke esta muy hazino, kaji dezmayado. Isser Harel, ke era el prezidente de los servisyos sekretos estava dizyendo “Lo mas difisil para mozotros era de saver ke deviyamos de kuidar su salud, de darle a komer, de araparlo, de kortar sus kaveyos, enfin de servir este ombre ke izo matar tantos miles de Djudyos, para pueder yevarlo sano i rezyo a Israel i para djuzgarlo aya.
El 23 de Mayo del anyo 1960, Ben Gurion diziya en la Kneset i al mundo entero ke el grande kriminel de la “Shoa”, Adolf Eichmann, estava agora en una prizyon en Israel. Su djuzgo izo muncho bruido ama al final fue enkolgado, su puerpo kemado, i las sinizas echadas a la mar afuera de las frontieras de Israel en 1962.
NUNKA MAS.
