"The Fablemans" es el filmo el mas personal de Steven Spielberg. Este filmo es sovre su edukasion judia i sus primeros anyos komo produktor de sinema.
La istoria del filmo es bazada enriva de su vida. El publiko judio estuvo asperando kon kuriozita komo Spielberg va reflektar su judaizmo. Spielberg eskrivio el senario kon su kolaborador, Tony Kushner, djusto despues ke eskaparon el lavoro enriva de “West Side Story”, disho Kushner. Ma el filmo no es sovre el judaizmo o el antisemitizmo. Es la istoria de una famiya judia, Los Fablemans.
Sammy Fabelman es enamorado del sinema desde su chikez asta el lise. De la primera shena se establesio el karakter judio de la famiya. En el empesijo del filmo, la famiya Fabelman (una alkunya judiya ke eskapa kon –man) estan bivyendo en New Jersey, i Sammy se esta indo a su kaza ke es la sola kaza ande no ay luzes de Navidad. En una otra shena, la famiya esta kantando la orasion de Hanuka, i ay una otra shena, la noche de Shabat kon las komidas tradisyonales judias i el hala (ke es el pan de Shabat). Mas despues, la famiya se muda a Arizona i despues se mudan de muevo al norte de California, ande ay muy pokos judios alrededor. En Phoenix, son vijitados por el tio abuelo de Sammy. El tio les konta istorias sovre komo salyo abash kon "los ke aborresen los judios" kuando estava en el sirko. El tio kijo prevenir Sammy ke un dia puede ser ovligado a elejir entre su famiya i su arte.
En la parte de California de la istoria, en el ultimo anyo del lise, Sammy es aturvado por elevos antisemitos ke lo yaman "Bagelman". Sammy empesa a flirtar kon una ijika kristiana ke kere azerlo kristiano. ‘’El antisemitizmo ke enkontri fue “solo’’ un chiko aspekto de mi vida… no fue un tipo de fuerza ke governo mi vida. Ma, me izieron muy, muy konsiente de ser un etranjero desde el empesijo” disho Spielberg.
Los detalyos de la istoria de vida de Spielberg son verdaderas. Spielberg nasio poko despues de la Segunda Gerra Mundial. El padre era enjenyor, la madre pianista. Eran una famiya judia ortodoksa. Steven asistio a la eskola judia kuando era chiko i izo bar mitzvah en Arizona.
Spielberg teniya tres ermanas mas chikas de el. Su madre i su padre divorsaron en los 1960’s. El sinema de Spielberg, el divorso, su paternidad, las relasiones tensas en su kaza fueron temas en munchos de sus filmos. Spielberg tambien izo filmos amatores de 8 mm en su chikez. En los 1960’s empeso su karyera komo uno de los direktores los mas reushidos de la istoria.
“Tony Kushner se komporto komo un un terapisto, en eskriviendo el senario del filmo”, disho Spielberg. ‘Yo era su hazino, avlavamos durante muncho tiempo. Tony me ayudo muncho. Kuando empeso el COVID... todos teniamos muncho tiempo i todos mos estavamos espantando muncho. I no saviamos kualo iva ser el estado del arte i el estado de vida. No saviya kualo iva deshar atras. Por esta razon apareji este filmo’.
Spielberg tiene 75 anyos. ‘Ma este filmo no es un sinyal ke va ser retradado. "Dainda tengo de azer munchas kozas" esta diziendo Spielberg.
