En muestra Komunitad tenemos la Sinyora Renan Koen ke es una pianista bastante renomada, ma se enteresa kon todo modo de aktividades muzikales. La semana pasada, dia de viernes, tenia una reunion en Ankara i me ambezi ke a la tadre en Ankara avia el konsyerto de Renan Koen kon la Orkestra Senfonika de la Prezidensia. Muy empotante. Kualo devia de azer? Anular el bilyeto de avion ke tenia i tomar el bilyeto para el volo dalkavo para Estanbol. I es lo ke ize i telefoni a Renan dizyendo ke keria un bilyeto. Es por la primera vez ke me esto indo a este salon maraviyozo ke fue fraguado por esta orkestra. Kuando entri aryentro la sala, reelmente me charpeyí kon la sala ke vide. Puedesh segir el konsyerto de todas las vandas. La orkestra esta kaji en el sentro de la sala.
El konsyerto era kompozado de dos partes. En la primera parte, el primer kante era un kante de Ali Darmar; “Recolletions for harp, flute and Strings". Era la Primera Mondial. El sigundo kante fue interpretada por muestra famoza pianista Renan Koen. Ya puedesh ser siguros ke en el empesijo estava tan emosyonado ke m’estava espantando si puede azer un yerro. Estava muy orgolyozo de ver a Renan en la shena. Kreo ke es por la primera vez ke un/una pianista o artista de muzika de muestra komunidad, reusho a ser la solista en un konserto de la Orkestra Senfonika de la Prezidensya.
La segunda partida del konserto era el kante de Michel Assael ke se yama “Auschwitz Symphonic Poem”. En esta partida del konserto Renan empleo el Chelesta ke es komo un piano chiko ma diferente del piano. Ay anyos ke Renan es enteresada kon los kantes de los Getos i de los kampos. Esto fue enterpretado por la primera vez en Turkiya. Fui ovligado de irme antes la fin porke devia tomar el avion dalkavo para tornar a kaza. Ma reelmente me plazyó muncho de estar en este konserto i felisitasyones a Renan Koen.
Es noche de djugeves ke teniamos el Sinyor Alain de Toledo, envitado por muestro muzeo, para una konferensia sovre los Sefardim durante la Segunda Gerra mondial en Paris. De Toledo es prezidente de la Asosiasyon Muestros Dezaparesidos i publikaron un livro sovre los Judeo-Espanyoles. Un livro enteresante ke avla sovre los Sefardim de Fransia. Los ke kombataron kontra los Alemanes en las fuersas de la Rezistensya. Serka de ochenta personas se toparon prontos para esta konferensia…
