El 21 disiembre es la data spesial de la noche la mas larga del anyo, el momento ke marka la fin de la oskuridad i la venida de la luz. Este dia fue muy importante para las sivilizasiones i para la psikolojia de los puevlos. Los antiguos romanos, los Saturnales, kreiyan en el dio Saturno, el dio prinsipal, el dio del tiempo, de la agrikultura i de la luz i selebravan “el renasimiento” del anyo muevo. En el Imperio Romano, en los dias oskuros desde el 17 asta el 25 de disiembre, iluminavan i dekoravan las kazas i las kayes kon kandelas, se arekojian amigos i famiyas al rededor del fuego, komian i se davan regalos. Los esklavos se regalavan tanbien del tiempo libre ke los balabayes les permetian.
A parte de este festival, los romanos tenian otra fiesta ke selebravan el 25 disiembre, Natalis Solis Invicti, el kumpleanyo del Sol. El kristianizmo avia empesado a influensar el Imperio Romano. Para introdusir esta mueva relijion i azerla akseptar al puevlo kon fasilidad, los romanos mantuvieron la data del 25 disiembre, i izieron un paralelizmo entre el nasimiento del Dio Sol, su dio tradisional i el nasimiento de Jesus, el muevo Dio Kristiano, simbolizando “El Sol de Justisia” o “La Luz del mundo”, lo ke no tiene de ver kon la Biblia. Konservaron la palavra Nativita, ke en la lingua Latino dizenya “el aniversario de un emperador o del dia de su asension al trono”. De esto proviene el nombre Navidad (Noel en espanyol), la nativitad, el nasimiento de Jesus.
Los dias kurtos de disiembre, se fiestaron en diferentes kulturas i su kulto a las luzes tienen sus orijines antropolojikos. El umano, durante este mez, el mas oskuro del anyo, tuvo menester de luz segun sus tradisiones. En el Norte, el solstisio* del invierno sinyifikava el triumfo de la vida sovre la muerte i la venida de Jesus, el salvador, al mundo fue para liberar la umanidad de la oskuredad i ayudar a detenerse a la vida.
La fiesta de Hanuka de los judios, es una selebrasion i tiene la luz en su esensia. No es mensionada en la Biblia ebrea, es una fiesta tradisional, ke da luz i alegria a la kaza durante 8 dias i los chikos resiven regalos.
Todos los umanos son moradores de un mismo mundo i en toda la istoria de la umanidad ay la bushkeda de la luz i dar una sinyifikasion a la vida.
“La lampara nesesita la luz, ma la luz no nesesita la lampara”. A. Baha
