Anna Eskinazi
Estanbol es un esfuenyo. Su vida se refleta en todas las maales yenas de istorya profunda. Estanbol tiene el privilejyo de ser la unika sivdad en el mundo ke esta situada entre Asia i Evropa, kere dizir dos kontinentes separados i unidos por el Bosforo, komo amantes lokos, amorozos sin fin, ke bushkan a kada paso de versen i konosersen mas i mas. I se dize tanbyen ke es la unika sivdad ande la mar pasa de aryento de esta sivdad. El Bosfor es el estrecho ke une kon ardor estos amantes, Asia i Evropa. Los korientes los abrasan kon fervor. Kon los anyos, este eksepsyonal riyo majiko, kon su kolor i perfume enkantador abrasa los pasajeros sin kansarse kon toda su sublima i profunda amistad.
El tiempo pasa kruelmente i los kambios atristen a los ke konosyeron la vida entelektual inkomparable de esta sivdad ke nunka se kansa ni se kesha...
Kon el tiempo, muevos movemientos van a inspirar los inovadores i van a dar un karakter spesyal i dinamiko.
Un diya de otonyo, suvir en Eyup, a la kolina Pierre Loti, tomar un kafe turko a la echada del sol, o enkantarse de las luzes de plata de la luna sovre el kuerno de oro es ser un verdadero amante de la sivdad.
El arte kulinar mos enkanta kon sus entradas, (mezes) platos infinitos de verduras, legumbres i karne preparados al gusto del paladar de kada uno, i la savor de boka ke yega al final de kada pranso, aze una sinfoniya imperyal.
Dar tornos en las Adas, navigar en las aguas tormentadas de la Mar Preta o trankilmente desharte a los korientes de las aguas del Bosfor, es un enkanto.
Los Diozes del amor de la antiguedad ke estan eskondidos en la kolina de Chamlidja, tienen el dover enkantador de ennamorar a los ke vienen a divertirsen.
El Kapali Charshi, kon sus kayes estrechas, sus entradas de tantas puertas, sus botikas sin fin i los vendedores ke te atagantan, te azen sintir una klostrofobiya ke troka en una eforiya kon las rikezas de las vitrinas yenas de djoyas de mil i una noche ke te azen sintir komo la Sultana preferida del Palasyo. Los tapetes de seda de todos los kolores te azen bolar komo un pashariko a los payizes de los mas egzotikos i aleshados. Entre el oro i las piedras presyozas montadas en los aniyos, kolyares i kolanas ya te dan un ayre de Reyna, ke te aze kaminar kon una gava ke no toparas nunka mas en otro lugar.
Las nochadas kayendo, los stores de las ventanikas se travan, las luzes poko
a poko empesan a ensendersen, las velas tremblan delantre las ventanas,
los muezzines azen sus yamadas de los minaretes kon sus bozes tristes, ke mos akodran la miserikordya i mos dan pensamyentos yenos de valores umanos.
Un diya mas pasado kon istorya, arte, naturaleza, amor i fantaziya.
Estanbol kedara siempre kapital istorika i majika del mundo, kon sus karakteristikas i su silueta unika.
Saludos a todas i a todos ke se dizen Istanbulli i ke se deshan perder en las kayes de esta sivdad tan rika de istorya i vistas divinas.
A vermos kon alegriyas, paz i salud.
