Anna Eskinazi
Vijitar Galeriyas son paseos a diversos universos muevos, ke kaji es imposible de konoserlos sin estar entre las ovras eskojidas por munchas i munchos ekspertos. Komo los muzeos tratan de diferentes sujetos, i en las galeriyas kada uno topa su amor i ardor entre estos artikulos desinyados por los amantes del arte. Munchas vezes si una ovra o instalasyon no koresponde a tu gusto, a tu ideal o a tu idea, troka kon el tiempo asta ke se konsidera klasiko.
Para satisfechar kompletamente tu pasion, es una okazyon de trayer tu punto de vista, dar tu idea o adjustar un pensamyento muevo inovador de manera mas universal i avrir kaminos ke yegaran a plataformas del mundo intelektual. Ansi se toparan mezas kon platos diversos ande se puedra savorear i degustar miles de savores i eskojer entre estas delisyas ke van a enrikeser el paladar del konosimyento i el universo del pensamyento. Ay tambien siempre savores de boka, ke toman el lugar del primer plato. Esto se enkontra en munchas de las ekspozisyones.
En un kantoniko entimo de tu korason toparas una emosyon frajil, una flecha ke te yegara sin apersivirte i te trayera una sonriza dulse a tus mushos pintando sentiyas en tus ojos.
Oy en dia los artistos avren ekspozisyones en galerias de arte i en edifisyos de strukturas muy diversas. Lokales orijinales, kaji inimajinables en los anyos pasados, estan yenos de ovras modernas des artistos inovatristos, prontos a sorprender el publiko ke tiene siempre una ser por las ovras orijinales i los korientes muevos.
Enstalasyones diversas avren un mundo de suenyos eksepsyonales, i los jovenes ke son siempre muy rebeles topan un universo espasyozo para deskuvrir, pensar, arepozar, i deskansarsen libremente.
No olvidar ke el mundo del arte pasava i traversava kaminos yenos de punchones, luchando kon la ambre, la povresa, el kalor, el frio i kontra el oskuro kamino de la depresyon. A vezes el suisidyo fue la luz del artisto i el kamino el mas kurto ama trajiko de la delivransya.
Para olvidar la mizerya, una kupa de vino barato, i el amor de una chika o chiko, fueron tambien una melizina muy apresyada.
Vijitar galeriyas i viajar, avren un mundo eksepsyonal para konoser la djente, los payizes aleshados, diferentes modos des vidas, kostumbres ke mos azen umanos mas induljentes i mas komprehensibles i avren el kamino entelektual de diferentes epokas.
