En el Pirke Avot, la Mishna 2/5 Ilel mos ambeza: no te abstraktes de la komunidad.
“Al Tifrosh Min Atsibur”: komo partajas los evenimyentos felizes, azete haver i de las amarguras. Siente la dolor de los otros. Por egzemplo, si un dezastre derroko a unas kazas afilu a ti no, sos ovligado de ayudar. Esto dize Zohar (Kabala) por azer orasyones endjuntos. Porke azer orasyon endjuntos, es mas valutozo de azer personalmente, komo kada demanyana azer tefila en la keila.
Mas de esto, debasho de estas palavras inkluye, azer ayudos endjuntos. Oy en diya estamos muy tristes. De ver la dezgrasia del rash. Mos esta amargando los korasones. Munchos i munchos estan koryendo para azer lo ke les viene de la mano. Ma kale azer atansyon a kualo tyene menester la persona defrente. Las asosyasyones psikolojikas estan partajando kon los kolegas, munchas enformasyones sovre la trauma. Se dize: primeros kudyos psikolojikos. Por esto no es menester de ser espesyalisto. Toda la djente ke kere ir a la rejyon del dezastre kale ke sepa los primeros kudyos psikolojikos. Seya por las viktimas, seya por si.
Unas kuantas chikas notas:
Si tyenes enfrente una persona ke peryo al ke ama, no digas:
Komo estas palavras i mas i mas. El menester es estar aya, sentir al defrente i sintir. Solo, solo esto es el menester. Ser respektuozo i kerensyozo. Kale dizir a las viktimas: ya savemos; por muncho tiempo van a tener soledad, dolor i ravya…
Si estas en la rejyon del dezastre i estas viendo ke no estas puedyendo salir abash, kon los problemes, es bueno demandar ayudo de un espesyalisto. La persona ke va ayudar kale ke durma bueno i ke koma bueno. Kale ke sepa ke i el va travar un tiempo la dolor de la sufriensa. En vezes kale dar un poko de antrakt. Azer egzersizes de relaks, azer kalmar de si para si o eskrivir diario. Komo estos ay munchas fasilidades ke kale ambezar antes de salir al kamino para ayudar a las viktimas i por si.
Kada diya tres vezes meldamos en la Amida: Refaenu Adonay venerafe oshienu venivashea ki teilatenu Ata, veaale aruha umarpe lehol tahaluenu ulhol mahovenu, ulhol makotenu ki El rofe rahman veneeman Ata. Tu el Dyo poderozo, azemos sanar i vamos a sanarmos. Salvamos i mos vamos a salvar. Porke Tu sos el Poderozo ke kuras muestras hazinuras, Tu sos el perdonador i Tu sos muestra konfiensa.
Dyo Santo! Dame koraje para trokar, lo ke puedo trokar, dame kalmo i pas interior para akseptar lo ke no puedo trokar, i dame sensya para entender lo ke es la diferensia del uno al otro.
