No se komo va empesar mi artikolo de esta semana. Puede ser ke ya veriyash ke dos semanas no eskrivi. Porke el maldicho virus, Corona, mos vijito i a mozotros a la fin. Tanto ke mos guadrimos tanto ke no bivimos normalmente, yene mos aferro. Grasias al Dio ke lo pasimos livyano, ma Corona es Corona, no desho ni hal, ni fuersa. Estas dos semanas dalkavo las pasimos kon evenimyentos ke mos markaron bastantemente.
El primer evenimyento fue ke mi marido i yo aferrimos el Covid19. Ampeso kon sarnudar i dolor de garon, izimos el test ke salyo pozitif. Ansina ampeso la hazinura. Pishin mos telefonaron del Ministeryo de la Salud por “Gechmish olsun” i mos mandaron kuras. Este modo de atansyones aze plazer i kayenta los korasones. Sanos ke esten. Esto pensando ke lo aferrimos del espital ke fuimos ovligados de ir para un kontrol medikal. Malgrado ke teniyamos las maskas.
Ansina, fuimos ovligados de estar en kaza unos diyez diyas, en tomando las kuras. Bendicho el Dio ke ya paso, ma dainda no ampesimos a salir a la kaye por modo ke yelaron los tiempos i tuvimos inyeve.
El sigundo triste evenimyento fue el Terremoto de KahramanMarash, ke no desho piedra ensima de piedra aya, i al entorno de 10 sivdades ke fueron tokadas. Uvo munchos apartamentos ke fueron derrokados, deshando debasho las ruinas miles i miles de personas. Aparte las piedritas, uvo tanbien munchos firridos. De ver en la televizyon las bushkidas de puerpos entre los blokes de beton fue muy emosyonante. Sovre todo de ver komo kitaron de la tierra famiyas enteras, marido i mujer, ansi ke kriyaturas chikas. Munchos payizes del mundo mandaron ekipos spesyalizados para salvar almas. Komo la Fransya, Ingleterra, Azerbaydjan, Israel, Espanya i mas. La Turkiya entera se mobilizo para ayudar. Mandaron todo lo ke toparon, vistimientas, aguas, mantas i kolchas, kalsados i kalsas i todo lo ke vos puedesh imajinar. Piles, lampas, chapeyos i mil i una koza mas.
Unas de las sivdades ke se efasaron de la mapa, fueron Iskenderun, Hatay i Antakya. En estas sivdades ke se topan al sud de la Turkiya aviya una komunidad muy antigua Judiya de mas de 2000 anyos. Aya biviyan oy unos kuantas famiyas judiyas. Desde ke tomimos haber del terretemblo, la komunidad judiya de Estambol salyo al kamino para salvar i ayudar muestros ermanos. Ma malorozamente el prezidente de la Komunidad Judiya de Antakya, el Sinyor Shaul Cenudioğlu i su mujer la Sinyora Tuna Cenudioğlu, kedaron debasho las ruinas i piedreron sus vidas. Rav Mendy entro al kal destruido i arekojo i salvo los rulos de Tora ke datan de miles de anyos. Los judios ke moravan aya ke kedaron sin kaza i morada, fueron trayidos a Estambol i fueron lojados en Or Yom, sin mankura de nada.
El Dio ke no mos aprove mas, kon este modo de dezgrasyas. Amen.
