Si meldatesh el Şalom de la semana pasada ya savesh lo ke afito en Turkiya. Lunes demanyana kuando mos alevantimos oyimos i meldimos lo ke afito en una grande partida de la Turkiya. Un rash de 7,7 de violensya. Vimos la mizma violensya en 1999 bivyendo el rash en Estanbol. Ma esta vez estava mas terrivle. Solo en Turkiya se sintio en 10 sivdades. De Maraş a Adana i de Hatay asta Diyarbakır. Dospues mos embezimos ke se sintio en la Siria dando un danyo muy emportante. Mos telefonaron de Israel; mizmo aya se sentio en munchas sivdades. El sentro del rash era la sivdad KahramanMaraş, sivdad emportante por la endustria de la Turkiya. Se topa aya munchas fabrikas ande se aze la produksyon de ilos de algodon. Ya se save ke 14 miliones de personas biven en estas sivdades.
De las 4 i 12 de la demanyana paso a penas 9 oras i un segundo rash de una vyolensya de 7,6 en la mizma sivdad en KahramanMaraş. Un ombre de sensya Fransez eskrivyo un artikolo sovre estos dos rashes i disho ke kon esto ke turo mas de 100 segondos; i komo se realiso a 7 kilometros i medio de ondura, esto izo un danyo de un rash de 11 de violensya. Es por la primera vez ke vemos en Turkiya un rash ke influenso 10 sivdades. Ay miles i miles de personas ke ayudan para salvar las personas ke se topan debasho de las ruinas. Los Israelyanos embiyaron un ekipo de 400 personas. Los 150 estan salvando las personas ke se topan debasho de los edifisios derrokados. I los 250 estan fondando un ospital ambulante. Ya savemos ke asta viernes demanyana avian salvado 17 personas. Ya meldimos ke el Rabinato, en Israel izo una deklarasyon permetyendo a este ekipo de pueder lavorar el diya de Shabat para salvar la vida de las personas. El hahambaşılık Turko se estava okupando para embiyar komida kasher de Bursa asta esta parte de la Turkiya para los Israelyanos.
Oy, sinko diyas i medio dospues ay en Turkiya 31.000 personas ke se murieron debasho de las ruinas. I 80.000 feridos. Ke dezgrasia. Ya vos dishe ke mizmo la Siria fue influensada. I aya ay 6.000 personas ke se murieron. Ke no vos pareska ke es el rezultado final. Debasho de mas de 6.000 edifisios no se kuantas personas mos desharon la vida. No se si vamos a pueder ambezarmos egzaktamente.
Vos kero avlar de los Djudios ke biven en Antakya. Ay una chika komunidad de 15 a 20 personas. I komo los telefones mobiles no fonksyonaron los primer diyas no teniamos haber. I uno de muestros prezidentes, İzak İbrahimzadeh tomo el primer avion kon 6 otros amigos i bolaron a Adana i de aya a Antakya. El aeropuerto de Hatay malorozamente no pudo fonksyonar porke la pista estava derrokada. Vyeron ke malorozamente el apartamento ande bivia el Sinyor Şaul Cenudi kon su mujer Fortune-Tuna, estava achunkado i arekojeron los otros Djudios en las kayes i en las arabas para traerlos a Estanbol. Mos ambezimos vyernes ke toparon sus muertes i diya de alhad se realizo los funerayes en Estanbol en el Simeteryo de Kilyos.
Keridos lektores, no mos puedemos imajinar komo munchas personas reusheron a sovrebivir 120 oras debasho de una ruina…
La semana venidera vos va kontar el ayudo del puevlo Turko; rikos o no a estas personas. Es un otro mirakolo.
