“Kuando el benadam aze planos para el avenir, el Dyo se riye”! Deke dizimos si kere el Dyo?
Pasimos i estamos pasando unos diyas muy aleskuros, dingunos no tyenen gana de nada, en un punto todo se izo de ariva abasho.
Dishe ke todos estan eskrivyendo enriva de esta dezgrasya, yo trokare el sujeto, ma no es posivle, no s'esta indo de los ojos lo ke estamos vyendo en los haberes. El Dyo ke les de fuersa a los ke estan penando para salvar una alma ma yo esto rogando por los ke se salvaron. Es verda ke estan bivyendo, komo van a kontinuar a bivir, munchos estan dizyendo keshke ke no mos salvaran.
En vyendo las kazas komo s'estan destruyendo, me vino al tino el filmo SODOM & GOMORA. El filmo dava un mesaje muy enteresante. Estas dos sivdades, fueron "destruidas por tremora de tyerra, ke vyene del syelo, por sus pekados".
No so relijyoza ma syempre kreyo ke el ke izo negreguras i echos illegales, un diya lo paga. Tengo munchos egzemplos.
Ma malorozamente kon eyos, pagan djustos por pekadores.
“En una sivdad biviya un ombre muy riko. Tanto era riko, mezmo el no saviya los shifros de sus byenes. Era muy kruel. Tanto era kruel ke no se adjideyava de dingunos. A la kontra kuando viya ke uno esta flako de salud u prove, lo arebashava i lo trespizava mas muncho. Teniya una gaava ke era riko, porke era patron de muncha moneda, le paresiya ke puede azer todo lo ke kere. Kada demanyana en indo al echo, pasava por las botikas ke teniya, a todos los ke lavoravan los gritava i los ensultava. Si alguno de eyos le respondiya, lo mansinava i no le dava la semanada.
Los anyos pasaron de esta manera i por siguro el buen del sinyor se izo viejo. Mas le pujo los anyos mas le pujo i la negregura. Munchas vezes kijyeron dizirle ke torne en teshua ma el siempre lo ke disho izo.
Una tadre, en tornando del echo a su kaza, oye una boz.
“Todo lo ke izites un diya lo va pagar”
No topo de pensar kualo es esta boz i ke kere dizir. Los primeros diyas no dyo emportansa i kontinuo a su kamino i su krueldad. Ma kuando esta boz kontinuo diyas i mezes empeso a dezrepozarse. Vino diyas ke koryo detras de la boz, vino diyas ke se tapo las orejas para no oyir i vino diyas ke iva peryer el meoyo ma la boz nunka se kayo.
Una tadre yene en tornando del echo a su kaza, albonozo i enkieto le vyene la mezma boz:
“Lo ke izites un diya lo va pagar”, “un diya lo va pagar”
Mas no pudo rezistir; se abolto, miro a los syelos i en gritando:
“Ya basta! Kayate! Deshame repozado!
“Todo lo ke izites un diya lo va pagar"
“No esto entendyendo; ken lo va pagar? Dizeme ken!!! Ken lo va pagar???”
La boz le respondyo:
"Tu inyeto lo va pagar”!
