Estamos pasando dias areskuros en Turkiya a kavza ke uvo un grande terremoto en el Sur-este del paiz, un dezastre ke nunka no se tyene visto en el mundo entero malorozamente.
Mas de 28.000 muertos i 85.000 firidos se toparon en la kaye a media noche kon una inyeve fuerte. Todos kon pijamas sin tener una djaketa enriva entezandosen, vyejos, chikos, grandes, bebes, mansevos, ombres i mujeres… asperando kon grande inkyetud a los otros myembros de la famiya ke van a salvar, si estan bivos!...
Malorozamente kaji todos los apartamentos se dezazyeron komo la arina, porke uvo munchas neglijensyas kuando los konstruizaron. Los konstruktores de los edifisyos no uzaron los materyales ke eran nesesaryos i munchos materyales de negra kalidad.
Una grande majoriya de los paizes en Evropa komo Alemanya, Israel i munchos otros embiyaron ayuda kon aviones, personas, mansevos para pueder kitar los ke estan debasho de las kazas ke se dezazyeron.
Dos terremotos de 7.8 i 7.5, fueron la kavza de miles de viktimas, en el sudeste del pais, esta rejyon es konsiderada una de las zonas sismikas mas aktivas del mundo entero. Esta zona sufriyo 50 tremblemyentos fuertes en el ultimo siglo. Se esta konsiderando ke asta agora es el séismo el mas grave de la istorya resiente.
El prezidente turko afirmo ke se trata de una muy grande trajediya sufrida en el pais, i kontinuo en dizyendo ke esto es el dezastre del siglo ma todos endjuntos, mano kon mano, kon solidaridad vamos a pasar esta perioda areskura.
Turkiya okupa el kuatren lugar entre los paizes kon mas dezastres en el mundo.
Siguramente ke, i el danyo a la ekonomiya del paiz tambyen es muy alto despues de estas katastrofas naturales.
Los sientifikos estan dizyendo ke el terremoto fue superfisyal, no fue muy profondo, es por esto ke uvo esta demolisyon.
Agora se esta asperando un grande séismo en Estambol i los sientifikos mos estan avizando.
Lo ke devemos de azer es, de azer kontrolar los apartamentos ande estamos bivyendo, si estan rezyos, tomar dokumentos afirmados de la munisipalidad por estar siguros.
Todos estamos ayudando a las viktimas del terremoto, seya en embiyando paras, seya en embiyando vistimyemtas, kozas de komer, kayentadores, kolchas i mantas para kayentar, panyales para los chikos i munchos otros menesteres.
Esto arogando al Dyo Poderozo, ke no mos mostre mas dezastres naturales en el mundo entero, i ke las personas seyan mas sensivles al den frente, kerensyozos, tolerentes i util para todos.
