La semana pasada afito un terremoto muy fuerte en el sud-este de la Turkiya. Esto fue una dezgrasya. Miles de muertos i miles de firidos i tanbien miles de pedridos ke no se save ande estan. Ya salyeron de debasho de las ruinas, los yevaron kon ambulansas ma no se save ande. Porke en primero los yevaron a un espital, ma si ven ke no es spesyalita suyas, los transferan a otro espital. Puedeser ke estan dezmayados o estan en shok ke no saven ken son, tanbien komo estavan durmiendo a medya noche, no teniyan ni papeles de identidad. Semana entera vimos komo salvaron a las personas de debasho de las ruinas. Mizmo en el onzen diya pudyeron salvarlos. Sin komer i sin bever 11 diyas. Komo puede ser? Mozotros (yo avlare por mi) un diya de Kipur, despues de las dos la ora ya ampesamos kon mareyos i shasheyos, dolor de kavesa, dezmayos, asta ke vemos la azete kon el pan i bevemos la supa o el kafe. Estar debasho las piedras sin komer i sin bever durante 11 diyas no es mirakolo? No es ke so doktor o tengo alguna spesyalista en medisina ma de lo ke meldamos i vemos ya tenemos una nosyon. Ya savemos ke los renes se sekan, los entestinos se danyan, de estar inaktivos se atrofiyan; los musklos se derriten i munchos kavzos mas ke no kero ni nombrarlos. Por esto espero ke todos los ke salvaron van a bivir sanos i rezyos.
Ma vos kero kontar un otro mirakulo ke kedi enkantada.
Estavan azyendo roportajes en la televizyon, kon personas ke salvaron de debasho las ruinas. Un mansevo konto ke kedo en vida en komiendo las flores ke aviya sembrado su madre. Otro konto ke se kayo de ariva, al kat de abasho ande aviya un market, i ande kayo se topavan las beviendas komo Cola i kedo diyas largos en bevyendo estas beviendas. Vino la sira a una ijika chika de 5-6 anyos. Estava en su kama en el espital. La aviyan alimpyado, peynado i le aviyan metido tanbien ahrandas a los kaveyos. Teniya una kara riyente. El ke estava azyendo el roportaj le demando dos tres demandas. -No te espantates de kedar aya debasho? -Si! Disho la ijika. -Komo kedates aya debasho tantos diyas sin komer i sin bever? No tuvites ser? No! Disho la ijika en lo ke tuve muncha ser, pensi ke kero agua i sinti ke me vino la agua, ansina no tuve ser.
Keridos amigos, kedi enkantada. Savesh lo ke me vino al tino? Lo ke meldamos en muestros livros. Kuando salieron de Ayifto i kaminaron 40 anyos en el dezierto, El Sinyor del Mundo les mando la Magna. Kada diya les mandava una magna i Shabat les mandava dos. Esta magna kuando la komiyan tomavan la savor de lo ke dezeyavan.
Lo ke mos konto esta ijika mos amostra ke no kale pedrer la esperansa i la fe en el Dio. Siguro ke kale tanbien akavidarmos. Komo dizen en turko: En primero kale atar el azno a un arvole rezyo i despues konfiyarlo al Dio.
Auguro al mundo entero ke mas no veyamos este modo de dezgrasyas.
