Afilu ke no me sinti el rash efektivamente, dayinda no esto puedyendo durmir repozada. Kada ora i kada diya, los haberes estan diziendo ke ay mas munchos ferridos i muertos. Estos, todos los benadames, solo se esta nombrando komo un shifro, diya en diya esta pujando. Mos estan apretando a los korasones.
Kero gritar kon una boz muy muy alta… proveteros… teniyan dezeos, teniyan es.huenyos, eran profesyonales, eran padres, madres, kreaturas, eran maridos, eran mujeres de famiya… todos teniyan una istorya, chika o grande ke desharon sus rastros enriva de unos.
Si… es djusto; lo ke estamos pasando es una dezgrasia muy grande. Ama lo ke mos esta apretando es, la dezgrasya vino mas muncho, kon la mano de las personas. Estamos trokando la naturaleza del mundo, para fraguar mas altas kazas i edifisyos. Estamos kortando los arvoles para avrir lugares a los edifisyos. I en este konteksto las fraguas si no se fraguan komo se deve esta trayendo mas muncho danyo del rash. Muy muy pekado.
El anyo pasado viaji a estos todos lugares kon muestros amigos. Los moradores todos ospitalyeros, delikados, los lugares yenos de kultura rika, la djente uno al lado del otro seya Djudio, seya Kristyano o Muzulmano, Suryani o Alevi… en la sivdad aviya un bafo bastante kalmo. Todos i todo se derroko. Agora tyene de fraguarse esta sivdad de muevo. No es kolay ni el echo del Governo. 11 sivdades se afekto, se derroko. Es nesesaryo de entender, estas sivdades se van a rekonstruir de muevo. Ke todos tengan el poder para kurar las yagas.
Meldi en un artikolo sovre las leyes Hititas. Bivyeron 1400 anyos antes de Kristo. Puedeser ke aviya los mizmos problemes de oy. Kitaron esta ley sovre las fraguas, i sovre los kastigos para los arkitektos. (Ley 1.6)
“Los arkitektos tyenen una responsabilidad muy grande enriva de las fraguas. Si un arkitekto fragua una kaza i se derroka i uno de los abitantes se muere, la ley 229 dize, “kale ke seya matado”(Kılıç & Erdem, 2015.)
Deke pasan miles i miles de anyos i dayinda no tomamos lesones para bivir kon sensya mas orozos. Deke travamos las mizmas ansyas. No entyendo… lo ke sé es, en Antakya aviya un puevlo kerensyozo ke diziya:
“Yo nasi en HATAY!
Yo so Alevi, mi amigo tuvo un problem, me ize kon el Sunni; mi vizina se muryo, la keriya bien komo mi nona, me fui al funeray, a la eglisya, me ize Kristyano; mi vizino Djudio vino a mi kaza a komer i kon el, me ize Djudio; kanti en Kurdo, bayli kon todos endjuntos. PORKE YO SO NASIDO DE HATAY! YO SO SOLO i SOLO un BENADAM.
Rogo al Dyo ke kalme estas dolores, ke venga pas, i tomaremos las responsabilidades i las lesones, i seamos BENADAMES uno delantre del otro. Ke sus almas repozen en Ganeden!
