La semana pasada dospues del rash ke vimos su influensya en 11 sivdades i en dos payizes (Turkiya i Siria) eskrivi mi artikolo sovre una partida de lo ke vimos en las televizyones i sovre lo ke oyimos en diferentes konversasyones.
Vos dishe ke vos keria eskrivir esta semana sovre lo ke izyeron miles i miles de personas para ayudar estas personas ke estan en un estado muy terivle. Dospues del rash savemos ke no tuvyeron agua, elektrisita ni gaz naturel diyas enteros. Si no tenesh elektrisita no tenesh segurita. Porke las kayes estavan eskuro. Es dospues de unos kuantos diyas, dospues ke pudyeron dar la elektrisidad a las lampas de las kayes, i ke metyeron soldados, ke la djente tuvieron seguridad.
Dospues del rash el problem el mas emportante era de salvar la djente debasho de las ruinas i dar a komer a lo manko una supa a estas personas ke se salvaron. Los primeros diyas esto no fue muy fasil. Serka de 10 milyones de personas ke tyenen de menester de komer. Reelmente fue muy difisil. Ya se ke en el kuartier ande lavoro (Esenyurt-Avcılar) la populasyon no es muy rika, ma merkaron todo lo ke se topava en el market para embiyar a la rejyon ande afito el rash. El segundo diya me fui a una fabrika de kalsas ke se topa serka de mi echo i apenas reushi a merkar 4.000 pares de kalsas al nombre de una fondasyon para embiyar kon la Munisipalidad de Estanbol a la rejyon. Vos djuro ke el segundo diya no avia mas un par de kalsas en la fabrika. I la djente keria ayudar; i los patrones de la fabrika vendyeron sus kalsas solo para las viktimas. Kada vez ayudo la djente para merkar kolchas de lana o de pelush para pueder embiyar para esta djente ke bivyeron las 8 primeras noches en el friyo. Uşak es la sivdad ande ay una grande produksyon de kolchas. I kada vez dospues de una desgrasya no es posivle topar kolchas. Esta vez reushi a merkar 600 deyas para el Şalom. Es la gazeta i los ke lavoran i los ke eskriven en el Şalom ke ayudaron para merkar i para embiyar. Vos kero dizir ke reushi a produsir 1.000 kolchas embiyando ilos de lana a unos kuantos lugares i pudimos produsir al nombre de la fondasion del Quinsentenario.
Es 10 diyas dospues ke teniya una Reunion en la Kamareta de los Endustriales i dyeron karar de fondar una maale kon konteyneres. Van a formar una maale de 1.000 konteyneres. El grupo de los ilos dimos karar de merkar uno de los primeros konteyneres. I lo merkimos. Kreo ke la kamareta de los Endustriales en poko tyempo va reushir a realizar este proyekto. Ke no vos pareska ke egziste solo un proyekto. Kreo ke van azer a lo manko 100 proyektos asemejantes.
Noche de jueves syertos kanales de televizyon organizaron una nochada para arekojer moneda. Esto achetando ke este program fue echo kon los esforsos del governo; porke la Banka Sentral dyo 30 miliardas le liras ke es 1.600.000.000 de Dolares Amerikanos. I las bankas fueron ovligadas de ayudar kon munchas paras. Se arekojo 105 miliares de liras turkas ke vale mas de 5 milyardas i 600 milyones dolares amerikanos.
Para eskapar, diya de vyernes una lavorante vino i me disho ke keren aparejar 20.000 sandwiches i su marido kon su araba izo 2.000 kilometros para dar a esta djente los sandwiches i otras kozas. Es ande mi (la fabrika) ke aparejaron estos 20.000 sandwiches kon el ayudo de una partida de muestros lavorantes.
Reelmente los sivdadinos Turkos son prontos a dar todo lo ke tyenen para ayudar esta djente.
