En todo puevlo i sivilizasyon, el kalendaryo tiene una emportansa partikulara. Muestro kalendaryo data de mas anyos antes del kalendaryo kristiyano. Sus orijinas ampesan del tiempo del sigundo Beit Hamikdash, el tiempo ande los miembros del Sanhedrin asendiyan fuegos en el monte de los Olivieres, para anunsiar la aparisyon de la mueva luna. Los mesajeros se suviyan al monte i kuando viyan apareser el primo kruasan de la luna, gritavan “hadash, hadash” (muevo, muevo), de ande deriva el biervo “Hodesh” (Mez). Pishin asendiyan fuegos de un monte al otro para dar el mesaje a todos. Ma este sistem se revelo danjerozo despues porke muestros enemigos partikularmente los Samaritanos ampesaron i eyos tanbien a azer la mizma koza para embrolyar i mesklar las datas de la aparisyon de la luna. Por esto se abolto al sistem de mesajeros ke para anunsar el mesaje korriyan de un lugar al otro. Ma kuando la diaspora se espandyo muncho, fue emposivle de anunsar el nasimyento de la luna, en el mizmo diya. Por esto se enstituyo ke la diaspora tendra dos diyas de Rosh Hodesh i dos diyas de fiestas. Muestro kalendaryo tiene elementos de la kultura Babiloniana. Ma mos akodraremos ke la data de muestras fiestas es atada a la Tora. I el diya ampesa kuando se echa el sol del diya antes, komo el Shabat ke ampesamos a fiestar de noche de Viernes. Los mezes de la Luna son mas kurtos de los mezes del sol, i para ke muestras fiestas kaygan en las sezones djustas, se izo un sistem de “luna i sol”. Este sekreto fue revelado en 358 despues de la era Kristiana por el grande savio Hillel II, shefe del Sanhedrin, i este sistem kontinua asta oy. Para ke Pesah, Shavuot i Sukot kaygan en la djusta sezon, se adjusta en una perioda de 19 anyos un mez demaziya, 3-6-2-11-14-17-19. A este mez lo yamamos Veadar, o de su djusto nombre Adar Bet. El kalendaryo atado a la luna tiene 353-354 diyas i el anyo de Adar Bet tiene 383-385 diyas. El kalendaryo ebreo ampesa kon la kreasyon i se situa, asigun lo ke es eskrito el 7 Oktubre 3761 antes la Era Kristiana. En la Tora, el primer mez es Nisan, komo lo meldamos en la perasha Bo. (Este mez sera para vozotros el empesijo de todos los mezes) La Tora transfera las profesiyas de Moshe i las fiestas de enverano. El Talmud amostra las fiestas de invyerno, Hanuka i Purim enstituados por los Hahamim. Agora vos va dar un problem matematika, komo se topa del anyo latino al anyo ebreo i en kontrario, se adjusta u se kita un shifro stablo 239. En egzemplo, estamos agora en 2023. Para topar el anyo ebreo kitamos los 3 shifros dalkavo, ke son 023. El zero del empesijo lo kontamos komo 10. Yani se aze 1023. Kitando 238 de 1023 mos keda 784 i adjustando delantre, un 5, se aze 5784. Notaremos ke Rosh Ashana viene antes del anyo muevo jeneral. Si keremos topar el anyo latino azemos el kontrario, kere dizir adjustamos 239 a los tres shifros de la fin i metemos el shifro 2 delantre i se aze ansina 2023. En estos diyas ande estamos en kaza kon friyo i inyeve es un problem matematika para embevesermos i akodrarmos otruna vez de la alta sensya de muestros savios.
