Remarkaron ke los antilopes en la Afrika del sud se estan muryendo despues de komer las ojas del arvole de Akasya de la rejyon. En primero no entendyeron la razon de esta mortalidad. Despues notaron ke por modo de la sekiya en esta rejyon, los antilopes, a no tener la yerva, estavan komyendo las ojas de los arvoles de Akasya. Delantre de manka de pistas para entender esta mortalidad, un akademiko tuvo la idea de observar el estomago de un antilope muerto i konstato ke las ojas de akasya en el estomago del antilope no estavan dijeradas. Analizando las ojas se vido ke eyas teniyan una kantidad anormalmente alta de tanen, koza ke jeneralmente las ojas produsen para protejarsen de los parazitos i de los mikrobes.
Los siantifikos se demandaron si aviya una relasyon entre la mortaldad de los antilopes i la altura de tanen de la ojas. Izyeron otra prova; aharvaron los arvoles kon fuersa i vyeron ke la proporsyon de tanen en las ojas suvyo muncho mas ke la normal. En la natura los antilopes deviyan de komer sus yervas, ama por modo de la sekiya, no teniyan otro remedyo ke de komer las ojas de akasya i kon esto se entosegaron i muryeron.
En su livro, “La vida sekreta de los arvoles”, Peter Wohlleben dize ke los arvoles tyenen una lingua muy elaborada, espesyal entre eyos; una lingua formada de golores i de sinyales elektrikas. Una lingua tanbyen a traves de las raises par komunikarsen i para ke se den haber de los insektos, de la sekiya de la tyerra, para kombatir el peligro, tener una defensa kollektiva i adaptarsen a los trokamyentos del klima. Las raises del arvole se espanden a una area el doble de su altura. Esto aze ke las ramas de las raises kontaktan kon las ramas de las raises del otro arvole, lo ke aze ke el haber se propaja de 1 cm por sekondo i los otros arvoles empesan a defendersen. Lo ke es enteresante es ke esta defensa se nota solo en el ambiyente forestero; en la zona agrikola la vejetasyon keda muda. Komo la mano del ombre toko i troko la vida natural de la agrikultura, el kontakto de rais o de golor no funksyona mas. Otro mesaj mas savrozo es el parfum ke embiyan syertos arvoles a traves de sus flores para yamar a las bizbas ke transmiten el polen, lo nesesaryo para la multiplikasyon.
Ke grande maraviya es la Natura, un mundo sin fin de sekretos i ke orozos mos sintimos kuando mos ambezamos sus sekretos.
