Ya savemos ke a los Amerikanos les plaze dedikar un nombre para kada dia del anyo. El 9 de Febrero era el “Dia Nasyonal de Dolor de Muelas”! Todos sufriyimos a lo manko una vez de dolor de muela i es difisil de entender ke savor toparon de dedikar un tal dia.
Al pareser ke tambyen muestros savyos relijyozos se enteresaron a las dolores de muelas.
Parese ke, en los dias del Talmud, el vinagre era un remedyo de uzo komun para el dolor de muelas. Esto se entyende por el fakto de ke los savyos diskuten la permisibilidad de bever vinagre en Shabat: “Disho Rabbi Yohannan, 'Ven i oye: kualker ke tyene problemas kon los dyentes no deve de alimpyarlos kon vinagre [sous entedido en Shabat] si solo esta pensando al dolor, no deve [alimpyarlos], ma si tyene una grande dolor (si esta sufriyendo muncho), es apropriado [ke se alimpye kon vinagre]'” (Talmud Avodah Zarah 28a).
Los savyos, a parte de esto, definen el tipo de vinagre ke se deve usar: “El Rabbi Aha Rabbikha (konosido komo Rav Aha Bar Pappa) sinyalo una kontradiksyon kon el Rav Abbahu… “Dizeremos ke el vinagre es bueno para los dyentes, ma esta eskrito (Proverbios 10:26), 'Komo el vinagre a los dyentes i komo umo a los ojos' [lo ke implika ke el vinagre es dolorozo para los dyentes]. No ay difikultad [porke] uno se refera al vinagre de fruta i el otro al asido” (Talmud Shabat 111a).
Un remedyo, una kura alternativa sitada en el Talmud: “Para una dolor de muela, Rabbah ben Rabbi Huna dize ke se deve tomar la parte de enriva de un ajo kon un solo dyente, mesklarlo kon azete i sal, i meterlo kon la punta de un dedo djusto en el lado ande le erguele la muela i meter un poko de masa al doredor, azyendo atansiyon a ke no toke su karne, porke le puede rezultar kon leprosis” (Talmud Gittin 69a).
Es posible ke estos remedyos no se komparan kon las kuras ke se puede topar afilu afuera de las farmasiyas de la era moderna; ma es enterasante i fasinante de notar lo ke la djente aziya antes del Aspirin!
